لاہور(پاکستان پوائنٹ نیوز09۔ستمبر2016ء) صوبائی وزیر بیگم ذکیہ شاہنواز نے آکھیا اے کہ موجودہ حکومت وچ پاکستان اند بالاں دی موت دی شرح گھٹ گئی اے، جو چنگی گل اے پر ملکی ترقی لئی ایہدے نال جُڑے ہوئے مسئلیاں نوں حل کرنا وی ضروری اے، پاکستان وچ مرد تے سوانیاں دی آبادی دا تناسب 51 تے 49 فیصد اے ۔ تفصیل دے مطابق جمعے دے دیہاڑے اک اجلاس دوران صوبائی وزیر نے آکھیا کہ کجھ چِر پہلے سارے ملک وچ سوانیاں دی صحت دے حوالے نال اوہناں نوں حق حاصل نہیں سن پر پنجاب سرکار سوانیاں نوں صحت بارے ساریاں سہولتاں دے رہی اے تے ایس مقصد لئی سرکاری ہسپتالاں تے بنیادی صحت دے مرکزاں دے نا ل نال ہور صحت دے مرکزاں وچ اُچیچے اقدامات کیتے گئے نیں۔
اوہناں دا کہنا سی کہ ہن سوانیاں نوں تندرست رہن تے زچگی دے دوران اپنیاں بنیادی لوڑاں دی فراہمی لئی وڈی ماترا وچ دوائیاں دِتیاں جاندیاں نیں جدکہ گھراں وچ وی سوانیاں نوں بیماریاں توں بچاء لئی مفت مشورے تے طاقت دیاں دوائیاں پہنچائیاں جا رہیاں نیں۔ بیگم ذکیہ شاہنواز نے آکھیا کہ اگلے 25 ورھیاں دے دوران ملک وچ آبادی ڈبل ہو جائے گی جہدے پاروں مسائل وچ وادھا ہوئے گاایس لئی ہر بندے نوں ایس سلسلے وچ اپنا اپنا کردار ادا کرنا چاہیدا اے۔
