اسلام آباد(پاکستان پوائنٹ نیوز09۔ستمبر2016ء) پاکستان وچ وفاقی حکومت نے ملک وچ رجسٹرڈ افعان مہاجراں دے پاکستان وچ قیام وچ ہور 3 مہینیاں دی توسیع کرن دا فیصلا کیتا اے، ایس توسیع توں پہلے افغان مہاجر چالو ورھے دسمبر تیکر پاکستان وچ رہ سکدے سن پر ہن اوہ مارچ 2017 تیکر ایتھے رہ سکدے نیں، ایہ فیصلا جمعے نوں وزیر اعظم نواز شریف دی سربراہی وچ وفاقی کابینا دے اجلاس وچ کیتا گیا۔
وزیر اعظم نے سرحدی امور تے شمالی علاقیاں دیاں وزارتاں نوں ہدایت کیتی اے کہ اوہ افغان مہاجراں دے خدشے دور کرن لئی ملک دیاں سیاسی جماعتاں دے آگوواں تے افغان نمایندیاں نال صلاح کرن۔ وزیر اعظم نے آکھیا کہ افغان ساڈے بھرا نیں تے سانوں بہت عزیز نیں اوہناں دی سہولت لئی مناسب تے ٹھوس اقدامات نوں یقینی بنایا جائے گا۔ وزیر اعظم نواز شریف نے آکھیا کہ اسیں ایس گل دی اجازت نہیں دیاں گے کہ پاکستان وچ رہن والے افغان مہاجراں نوں کسے وی طرحاں ہراساں کیتا جائے۔
