اسلام آباد(پاکستان پوائنٹ نیوز27۔فروری2018ء) امریکا نے اک وار فیر پاکستان اُتے زور دتا اے کہ اوہ اپنی زمین اُتے حقانی نیٹ ورک تے ہور دہشت گرداں گروہاں دی موجودگی دے مسئلے ول توجہ دیوے۔ پاکستان وچ منی لانڈرنگ تے دہشت گرد گروہاں دی فنڈنگ روکن لئی نظام دے نفاذ دے حوالے نال خامیاں نیں، جنوبی ایشیا بارے امریکی حکمت عملی اک مستحکم تے پرامن افغانستان دے قیام دے موقعے دی عکاسی کردی اے، امریکا پاکستان نال نویں تعلقات بنانا چاہندا اے۔
منگل نوں امریکی سفارت خانے ولوں جاری بیان مطابق امریکی صدر دی نائب معاون تے یو ایس نیشنل سکیورٹی کونسل دی سینئر ڈائریکٹر برائے جنوبی وسط ایشیا لیزا کرٹس نے اسلام آباد دا دورہ کیتا، دورے دوران سینئر ڈائریکٹر کرٹس نے خارجہ سیکرٹری تہمینہ جنجوعہ، وزیر داخلا احسن اقبال تے چیف آف جنرل سٹاف لیفٹیننٹ جنرل بلال اکبر نال ملاقاتاں کیتیاں۔ لیزا کرٹس نے پاکستانی حکام نال ملاقاتاں دوران آکھیا کہ امریکا پاکستان نال نویں تعلقات قائم چاہندا اے، جیہدی بنیاد ایس سانجھے عزم اُتے مبنی ہو ئے گی کہ اسیں رلکے ایہناں سارے دہشت گرداں نوں ہرا دیواں گے جو علاقائی استحکام و سلامتی دے نال نال افغانستان دے پرامن مستقبل دے سانجھے خاب لئی وی خطرہ نیں۔
