پشاور(پاکستان پوائنٹ نیوز26۔فروری2018ء) خیبرپختونخوا وچ نائیاں نے داڑھی دے ڈیزائن نہ بنان دا فیصلا کردے ہوئے ایس فعل نوں غیر اسلامی قرار دے دتا۔ تفصیل مطابق خیبرپختونخوا وچ نائیاں نے داڑھی دے ڈیزائن نہ بنان دا فیصلا کردے ہوئے ایس فعل نوں غیر اسلامی قرار دے دتا۔فرنٹیئر پروفیشنل ہیئر ڈریسر ایسوسی ایشن دے صدر محمد شریف نے دسیا کہ ایہ فیصلا صوبے بھر دے نائیاں دے اجلاس وچ کیتا گیا۔
اوہناں نے دسیا کہ اجلاس دے رلتیاں نے ایس گل اُتے اتفاق کردے ہوئے آکھیا کہ اوہ فرینچ، لائننگ یاں ہور کسے کٹ سنے داڑھی دے ڈیزائن نہیں بنان گے۔ اوہناں نے دعوا کیتا کہ ایس فیصلے مگروں پشاور وچ نائیاں دی وڈی گنتی نے ایس قسم دے سٹائل بنانے چھڈ دتے نیں۔ ایسوسی ایشن نے پشاور تے ہور ضلعیاں وچ پمفلٹ ونڈنے شروع کر دتے نیں، جہناں وچ اوہناں توں داڑھی دے ڈیزائن نہ بنان دی بینتی کیتی گئی جدکہ صوبائی راجدھانی پشاور دے علاقے سکندر پورا، سرکلر روڈ، حسن نگری تے ہور علاقیاں وچ نائیاں نے اپنیاں دُکاناں دے بوہیاں اُتے پمفلٹ لا دتے نیں، جہناں وچ ایس فیصلے اُتے رضا مندی ظاہر کیتی گئی اے۔
محمد شریف نے دسیا کہ اسیں ایہ فیصلا بغیر کسے دباء دے کیتا اے تے داڑھی دے ڈیزائن بنانا اسلامی قانون تے سُنت دے خلاف اے۔ ایسوسی ایشن دے صدر دا کہنا سی کہ اسیں آس کردے آں کہ نائی برادری ایس معاملے اُتے ساڈے نال تعاون کرے گی۔
