کراچی(پاکستان پوائنٹ نیوز26۔فروری2018ء) اک سال دوران پاکستان دے بیرونی قرضیاں وچ 13ارب13کروڑ ڈالر دا وادھا ہویا اے۔ سٹیٹ بنک دی رپورٹ مطابق پاکستان دے ذمے بیرونی قرضے 89ارب ڈالر ہو گئے۔ مرکزی بنک دے مطابق پاکستان دے بیرونی قرضے پچھلے ورھے 13ارب 13کروڑ ڈالر دے وادھے نال 89ارب ڈالر ہو گئے۔ جو ملکی تاریخ دا سبھ توں ودھ قرضہ اے۔ گورنر سٹیٹ بنک طارق باجوہ مطابق ملکی معیشت بہتری ول ودھ رہی اے۔
سٹیٹ بنک ولوں جاری بیرونی قرضیاں دیاں تفصیلاں مطابق حکومتی قرضہ 70ارب50کروڑ ڈالر ہو گیااے۔ ایہناں وچ لمی چِر دے قرضیاں دا کھلار 59ارب 45کروڑ ڈالر اے تے تھوڑے چِر دے قرضیاں دا کھلار اک ارب 16کروڑ ڈالر اے۔ حکومتی کنٹرول وچ وکھو وکھ اداریاں دے ذمے 3ارب10کروڑ ڈالر اے جدکہ حکومتی ضمانت اُتے نجی شعبے ولوں لِتے جان والے قرضیاں دا کھلار 7ارب24کروڑ ڈالر اے۔ وکھ وکھ بنکاں نے باہرلے ملکاں توں 4ارب70کروڑ ڈالر قرضہ لیا اے۔ آئی ایم ایف نوں 5ارب 91کروڑ ڈالر دینے نیں جدکہ 3ارب50کروڑ ڈالر سِدھے سرمایہ کاراں نوں دتے جانے نیں۔
