اسلام آباد(پاکستان پوائنٹ نیوز14۔فروری2018ء) میڈیا رپورٹس مطابق پچھلے دیہاڑے نواز شریف نے مسلم لیگ (ن) دے رہنماواں نال ملاقات کیتی۔ ملاقات دوران میاں نواز شریف چنگے موڈ وچ نظر آئے پر ایس دوران نواز شریف نے سابق وزیر داخلا چودھری نثار علی خان نوں وی تنقید دا نشانہ بنایا۔ اوہناں دا کہنا سی کہ مینوں موٹروے توں لاہور جان دا مشورہ دین والے کتھے نیں؟ جہدے آُتے باقی مسلم لیگ (ن) دے رہنماواں نے آکھیا کہ اوہ ہن نظر نہیں آن گے۔
نواز شریف دی ایس تنقید مگروں چودھری نثار علی خان دا ردعمل وی ساہمنے آ گیا اے۔ چودھری نثار علی خان دا کہنا ے کہ نواز شریف داموٹروے راہیں جان دا فیصلا میرا نہیں بلکہ ساری سینئر قیادت دا سی۔ چودھری نثار علی خان نے آکھیا کہ سینئر قیادت دا اک اجلاس ہویا سی جہدے وچ ایہ فیصلا کیتا گیا کہ نواز شریف لاہور جان لئی موٹروے ورتن گے۔ اجلاس وچ نواز شریف، شاہد خاقان عباسی سنے 11سینئر رہنماواں نے رلت کیتی سی۔ اوہناں دا کہنا سی کہ اک دو ارکان توں وکھ باقی سبھ نے موٹروے توں جان دا مشورہ دتا سی تے مری میٹنگ مگروں ایہ خبر اخباراں وچ وی چھپی سی۔
