لاہور(پاکستان پوائنٹ نیوز12۔فروری2018ء) عاصمہ جہانگیر دی بال ٹھاکرے نال تصویر دی وجہ ساہمنے آ گئی۔ تفصیل مطابق مشہور قانون دان عاصمہ جہانگیر کولوں بال ٹھاکرے نال تصویر بارے سوال کیتا گیا ، جہدے جواب وچ عاصمہ جہانگیر نے آکھیا کہ میری بال ٹھاکرے نال تصویر نوں پاکستان وچ بہت بُری طرحاں اُچھالیا گیا تے میرے خلاف اک منفی پراپیگنڈا کیتا گیا پر کسے نے ایہ نہیں پُچھیا کہ آخر ملاقات دی وجہ کیہ سی۔
عاصمہ جہانگیر نے آکھیا کہ مینوں اقوام متحدہ ولوں بھارت وچ جاری مذہبی فساداں کارن بھارت گھلیا گیا سی تاں جے میں ایس بارے تحقیقات کر سکاں ،میں ایس معاملے اُتے میں اک پوری رپورٹ بنانی سی۔اوہناں دا کہنا سی کہ جدوں وی کسے وی واقعے اُتے کوئی رپورٹ تیار کرنی ہوندی اے تے فیر اوس بارے سارے لوکاں نال ملاقات کردے آں تے میں گجرات تے بمبئی وچ جاری مذہبی فساداں دے شکار لوکاں نال وی ملی سی پر میری اوہ تصویر تے کسے نے شیئر نہیں کیتی۔
عاصمہ جہانگیر نے آکھیا کہ کاش میں اوہناں لوکاں نال وی اپنیاں تصویراں وکھاندی جو اوتھے مذہبی فساداں دا شکار ہوئے۔ عاصمہ جہانگیر نے ہور آکھیا کہ یو این او دی ویب سائٹ اُتے میری ایہ رپورٹ وی پئی اے۔ ایس رپورٹ وچ تُسیں ویکھ سکدے او کہ میں ہندو انتہا پسنداں دی تعریف نہیں کر رہی بلکہ رپورٹ وچ اوہناں دی زبردست طریقے نال مذمت کیتی اے۔ اوہناں دا کہنا سی کہ میں اوتھے کوئی اوہناں نوں چاہ پانی پُچھن نہیں گئی سی ۔
چیتے رہوے کہ عاصمہ جہانگیر نوں بال ٹھاکرے نال ملاقات تے تصویر بنوان دی وجہ توں سوشل میڈیا تے الیکٹرانک میڈیا اُتے ڈاڈھی تنقید دا نشانہ بنایا گیا سی۔مشہور قانون دان پچھلے دیہاڑے دل دا دورہ پین دی وجہ توں لاہور وچ چلانا کر گئیاں سن۔
