کہڑی جمہوریت تے کہڑا آئین، ملک وچ بادشاہت اے، غریب دی کوئی نہیں سُنداخورشید شاہ،

جدوں لوکائی دی گل ہوندی اے حکومتی تے اپوزیشن بنچ اوہنوں اہمیت نہیں دیندے: قومی اسمبلی وچ خطاب

کہڑی جمہوریت تے کہڑا آئین، ملک وچ بادشاہت اے، غریب دی کوئی نہیں سُنداخورشید شاہ،
جدوں لوکائی دی گل ہوندی اے حکومتی تے اپوزیشن بنچ اوہنوں اہمیت نہیں دیندے: قومی اسمبلی وچ خطاب

اسلام آباد(پاکستان پوائنٹ نیوز06۔ستمبر2016ء) قومی اسمبلی وچ قائد حزب اختلاف سید خورشید شاہ نے آکھیا اے کہ کہڑی جمہوریت تے کہڑا آئین ، ملک وچ بادشاہت اے جِتھے غریب دی کہانی کوئی نہیں سُندا، پاکستان دی تواریخ وچ کدی پٹرولیم وستاں اُتے اینا سیلز ٹیکس نہیں لگا جِتا ہُن حکومت نے لایا ہویا اے، ڈیزل دی اصل قیمت 36 رُپئے اے پر ایہنوں 74 رُپئے لیٹر دے حساب نال ویچیا جا رہیا اے، جس ملک دی آبادی وچ 80 فیصد لوک چِٹ کپڑیے ہون، اوتھے اِنج دے اقدامات عوام اُتے ظلم و جبر توں گھٹ نہیں۔

تفصیل دے مطابق منگل دے دیہاڑے نکتا اعتراض اُتے گل بات کردے ہوئے اپوزیشن لیڈر خورشید شاہ نے آکھیا کہ حکومتاں لوکائی دی بھلائی لئی ہوندیاں نیں، ساریاں سیاسی جماعتاں الیکشن توں پہلے اپنا منشور دیندیاں نیں پر ساڈی سوچ ووٹ لے کے عوام دی فلاح دی تھاں کمرشل ہو جاندی اے، اسیں اپنے خزانے بھرن لئی لوکائی اُتے ٹیکساں دا بھار پا دیندے آں۔ اوہناں دا کہنا سی کہ ملکی تواریخ و چ پہلی وار اک ورھے وچ 2100 ارب قرضا لِتا گیا۔

اوہناں نے آکھیا کہ پٹرولیم وستاں دیاں قیمتاں دنیا بھر وچ گھٹ ہو رہیاں نیں پر حکومت نے لوکائی نوں ایس معاملے وچ ریلیف نہیں دِتا، حکومت نے لوکائی دی فلاح دی بجائے کمرشلائزڈ راہ چُنیا اے، پاکستان دی تواریخ وچ سیلز ٹیکس اینا کدی نہیں لگا، پی پی دور وچ حکومت سیلز ٹیکس 16 فیصد لیندی سی۔اوہناں نے آکھیا کہ بڑے افسوس نال کہنا پے رہیا اے کہ جدوں لوکائی دی گل ہوندی اے تے حکومتی تے اپوزیشن بنچ اہمیت نہیں دیندے۔ اوہناں نے آکھیا کہ ایہ کم زیب نہیں دیندے، جس ملک دی آبادی وچ 80 فیصد لوک چِٹ کپڑیے ہون اوتھے اِنج دے اقدامات عوام اُتے ظلم و جبر توں گھٹ نہیں۔