لاہور(پاکستان پوائنٹ نیوز22۔جنوری2018ء) وزیر اعلا پنجاب میاں شہباز شریف نیب حکام نوں بیان ریکارڈ کروان مگروں واپس چلے گئے، نیب حکام نے شہباز شریف توں آشیانہ ہاؤسنگ سکیم بارے ڈیڈھ گھنٹہ پُچھ گچھ کیتی۔ میڈیا رپورٹس مطابق وزیر ااعلا پنجاب میاں شہباز شریف نیب ولوں طلبی اُتے اج اپنا بیان ریکارڈ کروان نیب دفتر اپڑے۔ جتھے شہباز شریف نے نیب حکام ساہمنے تفصیل نال اپنا بیان ریکارڈ کروایا۔
وزیر اعلا پنجاب اُتے آشیانہ ہاؤسنگ سکیم دی اُساری لئی اک کمپنی دا کنٹریکٹ رد کر کے دوجی من پسند کمپنی نوں کنٹریکٹ دین دا الزم اے۔ جہدیاں تحقیقات دے سلسلے وچ وزیر اعلا پنجاب میاں شہباز شریف ثبوت لے کے نیب دفتر اپڑے۔ شہباز شریف بغیر پروٹوکول نیب دفتر اپنا بیان ریکارڈ کروان اپڑے سن۔ چیتے رہوے کہ وزیر اعلا پنجاب میاں شہباز شریف نے پچھلے دیہاڑے میڈیا نال گل بات کردے ہوئے آکھیا کہ میرے خلاف اک دھیلے دی کرپشن وی ثابت ہو جائے تے میرا لوکاں دے ہتھاں وچ گریبان ہوئے گا۔
