دشمن نے ساڈے ول میلی اکھ نال ویکھیا تے مونہ دی کھانی پئے گی؛ سربراہ پاک فضائیہ

دشمن نے ساڈے ول میلی اکھ نال ویکھیا تے مونہ دی کھانی پئے گی؛ سربراہ پاک فضائیہ

اسلام آباد(پاکستان پوائنٹ نیوز06۔ستمبر2016ء) پاک فضائیہ دے سربراہ ائر چیف مارشل سہیل امان نے آکھیا اے کہ دشمن نے ساڈے ول میلی اکھ نال ویکھیا تے مونہ دی کھانی پئے گی، جنگ ہتھیاراں نال نہیں جواناں، عزم تے حوصلے نال لڑی جاندی اے، پاک فضائیہ اعلا پیشہ وارانا معیار تے بہادری دی تواریخ رکھدی اے۔ اوہناں نے ایہ گل دفاع دیہاڑ دے سلسلے وچ 1965 دی جنگ دے شہیداں دی یاد گار اُتے منعقد اک تقریب نال خطاب کردے ہوئے آکھیا۔

شہیداں دی یادگار دی افتتاحی تقریب پی اے ایف میوزیم وچ ہوئی،تقریب وچ نشان حیدر لین والے راشد منہاس شہید دی ماں نے وی رلت کیتی۔ ایس موقع اُتے پاک فضائیہ دے سربراہ نے آکھیا کہ وڈیاں قوماں ہمیشہ اپنے ہیروز نوں یاد رکھدیاں نیں تے تواریخ توں حوصلہ حاصل کردیاں نیں۔ اوہناں نے آکھیا کہ 6 ستمبر دی جنگ وچ پاک فضائیہ دے شہیداں نوں قوم سلام کردی اے،شہیداں دیاں قربانیاں پاروں اج اسیں آزاد ماحول وچ ساہ لے رہے آں۔

اوہناں نے آکھیا کہ 6 ستمبر دے شہیداں دیاں قربانیاں نوں ہمیشہ یاد رکھیا جائے گا، پاک فضائیہ اعلا پیشہ وارانہ معیار تے بہادری دی تواریخ رکھدی اے، ملک دی خاطر کسے قربانی توں گریز نہیں کیتا جائے گا۔اوہناں دا کہنا سی کہ دشمن دے خلاف جنگ ہتھیاراں نال نہیں بلکہ جواناں، عزم تے حوصلے نال لڑی جاندی اے تے جے دشمن نے ساڈے ول میلی اکھ نال ویکھیا تے اوہنوں مونہ دی کھانی پئے گی۔ ائر چیف مارشل نے یادگار شہیداں اُتے پُھلاں دی چادر چڑھائی جدکہ جواناں نے سلامی پیش کیتی۔