لاہور(پاکستان پوائنٹ نیوز15۔جنوری2018ء) تحریک انصاف نے عمران خان لئی 17جنوری نوں مال روڈ اُتے احتجاج لئی نواں کنٹینر تیار کر لیا، کنٹینر ڈیڈھ کروڑ دی لاگت نال تیار کیتا گیا اے۔ میڈیا رپورٹس مطابق متحدہ اپوزیشن نے مال روڈاُتے 17جنوری دے احتجاج لئی تیاریاں شروع کر دتیاں نیں۔ عوامی تحریک دے پلیٹ فارم اُتے متحدہ اپوزیشن نے ماڈل ٹاؤن دے وارثاں نوں انصاف دوان لئی ملک بھر وچ تحریک چلان دا اعلان کیتا ہویا اے۔
احتجاجی تحریک دوران وزیر اعلا پنجاب شہباز شریف تے وزیر قانون پنجاب رانا ثناء اللہ دے استعفے لئی دباء ودھایا جائے گا جدکہ ختم نبوتﷺ دے قانون وچ بدلی دے ذمے واراں نوں سزا دوان دی منگ وی کیتی جائے گی۔ مال روڈ اُتے احتجاج لئی تحریک انصاف دی انتطامیہ نے وی چیئرمین پی ٹی آئی عمران خان لئی کنٹینر تیار کرنا شروع کر دتا اے۔ ڈیڈھ کروڑ رُپئے نال تیار کیتے جان والے کنٹینر وچ اک وکھ کمرہ بنایا جائے گا جتھے عمران خان پارٹی اجلاس وی کر سکن گے جدکہ ادھے کنٹینر نوں احتجاجی تحریک لئی رکھیا جائے گا۔
کنٹینر وچ فریج، ٹی وی، اے سی، انٹرنیٹ تے وائی فائی دی سہولت ہوئے گی۔ وسیلیاں مطابق کنٹینر سکیورٹی پروف بنایا جا رہیا اے۔ پی ٹی آئی رہنما چودھری محمد سرور تے تحریک انصاف دے مرکزی سیکرٹری پبلسٹی وسیم چودھری دی نگرانی وچ بنائے جان والے ایس کنٹینر دی تیاری اُتے 15ملین رُپئے توں ودھ دا خرچہ آئے گا۔
