جتھوں زینب دی لاش ملی اوتھے محلے دے لوک پہلے ای اوہنوں بھال چکے سن

جتھوں زینب دی لاش ملی اوتھے محلے دے لوک پہلے ای اوہنوں بھال چکے سن

قصور(پاکستان پوائنٹ نیوز12۔جنوری2018ء)زینب دے گھر والیاں ولوں دسیا گیا اے کہ زینب دے قتل وچ پولیس دا کردار بہت مشکوک لگ رہیا اے۔ تفصیل مطابق قصور وچ زیادتی مگروں قتل کیتے جان والی معصوم بالڑی زینب دے گھر والیاں تے علاقہ واسیاں ولوں اک ہور انکشاف کیتا گیا اے۔ علاقہ واسیاں ولوں دسیا گیا اے کہ پولیس نے زینب نوں بھالن دی اُکا کوشش نہیں کیتی۔

علاقہ واسی اپنی مدد آپ دے تحت زینب نوں بھالن دی کوشش کر رہے سن۔ جس تھاں توں زینب دی لاش ملی اوتھے علاقہ واسی پہلے ای اوہنوں بھال چکے سن۔ علاقہ دے کُجھ لوک اوس تھاں نیڑے سن تے 24گھنٹے سارے علاقے وچ گشت کیتا جا رہیا سی پر فیر اچانک پولیس نے اوتھوں لاش ملن دی اطلاع دتی۔ ایہ گل مشکوک اے کہ جتھوں علاقہ واسیاں نوں لاش نہیں لبھی اوتھوں پولیس نوں اچانک لاش کیویں لبھ گئی؟سارے معاملے وچ پولیس دا کردار مشکوک ہوندا جا رہیا اے۔