لاہور(پاکستان پوائنٹ نیوز10۔جنوری2018ء) 2015وچ اوس ویلے دے وزیر اعظم نے دعوا کیتا کہ چنیوٹ وچ زمین ہیٹھوں سونا نکلیا اے، اوس سونے نال پاکستان دا قرضہ لاہ دتا جائے گا۔ وزیر اعلا پنجاب میاں شہباز شریف نے وی ایہناں ذخائر نوں اللہ دا انعام قرار دیندے ہوئے آکھیا کہ ہن اسیں کشکول توڑ دیواں گے۔ نجی ٹی وی دے اک پروگرام وچ ایس حوالے نال گل بات کیتی گئی ۔
گل بات دوران مشہور سائنسدان ڈاکٹر ثمر مبارک مند نے آکھیا کہ سانوں اطلاع دتی گئی کہ ایتھے سونے دے ذخائر نیں، جہدے اُتے وزیر اعلا پنجاب نے پنجاب منرل کمپنی نوں ٹاسک دتا کہ ایتھے ویکھو تے دسو کہ کیہ صورتحال اے۔ڈاکٹر ثمر مبارک مند نے آکھیا کہ پنجاب منرل کمپنی نوں میاں منشاء ہیڈ کر رہے سن۔ اوہ لما چِر لگے رہے پر اوہ ٹیکنیکل بندے نہیں نیں ایس لئی فیر مینوں آکھیا گیا کہ تے میں جواب دتا کہ مینوں ایہناں معاملیاں دا تجربہ اے تے میں تہاڈا ایہ کم اعزازی کر دینا واں۔
فیر مینوں پنجاب منرل کمپنی دے بورڈ آف ڈائریکٹرز دا چیئرمین بنایا گیا۔ ڈاکٹر ثمر مبارک مند نے آکھیا کہ اسیں وکھو وکھ ملکاں نال رابطہ کیتا تے اوہناں توں پُچھیا کہ اسیں ایتھے ڈرلنگ کرنی اے سانوں سو کِنا تانبا تے سونا اے۔ اسیں 28مربع کلو میٹر ایریا دی نشان کاری کیتی۔ اوہناں نوں ڈرلنگ دا کنٹریکٹ دتا۔ اوہناں نے ڈرلنگ کر کے سیمپل کڈھے سن کہ ایتھے کیہ شے اے۔ اوہناں نے ڈرلنگ کیتی تے سونا یاں تانبا نظر آیا۔
