جے میری اِٹ نال اِٹ وَجی تے نواز شریف صاحب تہانوں جدہ جان دا ویلا نہیں ملے گا۔

عمران خان سپیکر غیر جانبدار نہیں رہے، اداریاں توں انصاف نہ ملیا تے سڑکاں اُتے آواں گے: میڈیا نال گل بات

جے میری اِٹ نال اِٹ وَجی تے نواز شریف صاحب تہانوں جدہ جان دا ویلا نہیں ملے گا۔
عمران خان سپیکر غیر جانبدار نہیں رہے، اداریاں توں انصاف نہ ملیا تے سڑکاں اُتے آواں گے: میڈیا نال گل بات

کراچی(پاکستان پوائنٹ نیوز05۔ستمبر2016ء) عمران خان نے آکھیا اے کہ میرے خلاف کہڑا انکشاف ہویا، جہدے اُتے ریفرنس دائر کیتا گیا، سپیکر غیر جانبدار نہیں رہے۔ تفصیل دے مطابق کراچی وچ میڈیا نال گل بات کردے ہوئے تحریک انصاف دے چیئرمین عمران خان نے وزیراعظم نواز شریف نوں خبردار کردے ہوئے آکھیا اے کہ جے میری اِٹ نال اِٹ وَجی تے نواز شریف صاحب تہانوں جدہ جان دا ویلا نہیں ملے گا۔

اوہناں نے آکھیا کہ جے پرامن انقلاب دا راہ بند کیتا گیا تے خونی انقلاب آئے گا، میرے خلاف ریفرنس منظور کر کے پارلیمنٹ دی کریڈیبلٹی ختم کیتی گئی کیوں جے سپیکر آپ دو وار دھاندلی نال چُنیا گیا، حکمران کرپشن نوں بچان لئی اداریاں نوں تباہ کر رہے نیں۔ اوہناں نے آکھیا کہ پاکستان دے ادارے مظلوم خلاف نہیں ظالم نال کھلوتے نیں۔ اوہناں نے آکھیا کہ نواز شریف نے باہرلے ملک ارباں دی پراپرٹی دا جواب دین دی بجائے ریفرنس دائر کر دِتا۔

اوہناں نے آکھیا کہ پاناما لیکس وچ میرا ناں نہیں آیا پر سپیکر نے نواز شریف خلاف ریفرنس رَد کر دِتا جدکہ میرے خلاف ریفرنس منظور کر لیا اے۔ اوہناں نے آکھیا کہ رائے ونڈ مارچ لئی پورے پاکستان توں لوک لیاواں گا۔ اوہناں نے آکھیا کہ اسیں رائے ونڈ جا رہے آں، نواز شریف دے گھر نہیں جا رہے نیں، آکھیا جا رہیا اے کہ عمران خان دے گھر دی اِٹ نال اِٹ وجا دیاں گے۔ اِٹ نال اِٹ میری نہیں نواز شریف تہاڈی وجے گی۔ اوہناں دا کہنا سی کہ جے اِٹ نال اِٹ وجی تے نواز شریف نوں جدہ جان دا ویلا نہیں ملے گا۔