اسلام آباد(پاکستان پوائنٹ نیوز01۔جنوری2018ء) سابق صدر پرویز مشرف نوں قریبی ساتھیاں نے نگران حکومت بندے ای ملک واپسی دا مشورہ دے دتا، سابق صدر نے پارٹی دی اعلا قیادت تے قریبی ساتھیاں نوں مشورے لئی دبئی سد لیا۔ وسیلیاں مطابق سابق صدر نے چالو ملکی صورتحال تے آؤندے الیکشن دی آمد نوں مُکھ رکھدے ہوئے سیکرٹری جنرل ڈاکٹر امجد، آرگنائزر سیکرٹری مہرین آدم تے اپنے قانونی مشیر، وکیل اختر شاہ نوں دبئی سد لیا اے۔
اختر شاہ نے ملکی عدالتاں وچ سابق صدر خلاف سنوائی ہیٹھ مقدیاں اُتے بریفنگ دتی جدکہ ڈاکٹر امجد نے پرویز مشرف دے چھیتی ملک واپس آن دی مخالفت کردے ہوئے سابق صدر نوں اوہناں دے قریبی ساتھیاں ولوں دتے گئے مشورے کہ اوہ نگران حکومت بنن مگروں ملک واپس آن دی حمایت کیتی جہدی آرگنائزر سیکرٹری مہرین آدم نے وی حمایت کیتی۔ پرویز مشرف نے اختر شاہ نوں ہدایت کیتی کہ اوہ وکیلاں دیاں تنظیماں نال رابطے شروع کرن تے ایس حوالے نال آل پاکستان مسلم لیگ دے لائرز ونگ نوں متحرک کرن دا آکھیااے۔
وسیلیاں مطابق ڈاکٹر امجد نے سابق صدر نوں ملکی صورتحال تے ہور سیاسی جماعتاں دے رہنماواں نال ہون والیاں ملاقاتاں دی رپورٹ پیش کیتی جہنوں سابق صدر نے سلاہندے ہوئے پارٹی رہنماواں نوں ہدایت کیتی کہ اوہ ہور جماعتاں دے رُسے رہنماواں نال رابطے تیز کرن تے ہفتہ وار رپورٹ بنا کے دبئی گھلن۔وسیلیاں مطابق سابق صدر پرویز مشرف نے سیکرٹری جنرل ڈاکٹر امجد نوں لیگی دھڑیاں نال ملاقاتاں کرن تے اتحاد کرن والے حوالے فری ہینڈدے دتا اے۔
