اسلام آباد(پاکستان پوائنٹ نیوز30۔دسمبر2017ء) چیف میٹرو لوجسٹ ڈاکٹر محمد حنیف نے پیشنگوئی کیتی اے کہ نویں سال دی شروعات پاکستان وچ سردی دی لہر توں ہوئے گی۔ اک انٹرویو دوران ڈاکٹر محمد حنیف نے دسیا کہ ہفتے دے آخیر اُتے ٹھنڈیاں ہواواں دا سلسلا پاکستان وچ داخل ہوئے گا۔ اوہناں نے آکھیا کہ گلگت توں کراچی تیکر ٹھنڈیاں ہواواں سارے علاقیاں نوں اپنی ولھیٹ وچ لے لین گیاں پر ٹھنڈیاں ہواواں دا بُہتا زور بلوچستان وچ رہوے گا۔
محمد حنیف مطابق دو دن بعدوں کوئٹہ سنے بلوچستان وچ درجہ حرارت بہت ڈِگ جائے گا۔ اوہناں نے دسیا کہ کراچی سنے سندھ دے سمندری تے کُھلے علاقیاں وچ ٹھنڈیاں ہواواں داخل ہون گیاں۔ دوجے پاسے پاکستان دے اُتلے علاقے وی ٹھنڈیاں ہواواں دے اثر ہیٹھ رہن گے۔ ڈاکٹر محمد حنیف نے آکھیا کہ آن والے دِناں وچ چنگی بارش یاں برف باری دی آس نہیں اے۔ اوہناں نے دسیا کہ جنوری وچ معمول توں گھٹ بارشاں ہون گیاں۔اوہناں دا کہنا سی کہ بارشاں گھٹ ہون دے نتیجے وچ کولڈ ویو تے دھد بندی اے ، جہدے نتیجے وچ کُھلے علاقیاں وچ ڈاڈھی دُھند رہوے گی ۔
