راولپنڈی(پاکستان پوائنٹ نیوز15۔دسمبر2017ء) مسلم لیگ (ن) دے مرکزی رہنما و سابق وزیر داخلا چودھری نثار نے آکھیا اے کہ عدلیہ نال محاذ آرائی توں روکنا پارٹی قیادت نال اختلافات دی وجہ بنی، حدیبیہ ریفرنس بارے اج نواز شریف دے حق وچ فیصلا آیااے، مینوں کئی سیاسی جماعتاں ولوں رلت دی پیشکش اے پر (ن) نہیں چھڈی۔ سابق وزیر داخلا چودھری نثار علی خان نے چونترہ وچ عوامی جلسے نال خطاب کردے ہوئے آکھیا کہ حدیبیہ ریفرنس بارے اج نواز شریف دے حق وچ فیصلا آیا اے۔
نواز شریف نوں عدلیہ خلاف محاذ آرائی تے تنقید توں روکیا سی۔ مینوں اداریاں اُتے تنقید کرن کارن پارٹی قیادت نال اختلافات سن۔ اج وی پارٹی نال اختلافات دی وجہ عدالتی معاملات نیں۔اوہناں نے آکھیا کہ مشرف نے مینوں الیکشن وچ ہران لئی 5ان پڑھ وزیر ورتے۔ جنرل (ر) مشرف نے مینوں خریدن دی کوشش کیتی۔ اوہناں نے آکھیا کہ 35سال توں مسلم لیگ (ن) وچ آں۔ مینوں کئی سیاسی جماعتاں توں رلت دی آفر ہوئی پر (ن) لیگ نہیں چھڈی۔چودھری نثار علی خان نے آکھیا کہ میں ہمیشہ پارٹی وچ سچ بولیا اے۔ میرا سچ ای اختلافات دی وجہ بندا اے۔
