اسلام آباد(پاکستان پوائنٹ نیوز11۔دسمبر2017ء) حلقہ تھوراڑ دے 100توں ودھ خاندان مسلم لیگ(ن) وچ رلتی ہو گئے، ایہناں خانداناں نے سابق وزیرا عظم میاں نواز شریف، وزیر اعظم آزاد کشمیرراجا محمد فاروق حیدر خان تے سردار عبدالخالق وصی دی قیادت اُتے اعتماددا وکھالا کیتا۔ حکومت آزاد کشمیر محمد نواز شریف دے ویژن مطابق کم کر رہی اے تے ساڈا مقصد کشمیر وچ گڈ گورننس لیان، میرٹ دی بحالی تے بغیر فرق دے لوکائی دی خدمت کرنا اے، سردار عبدالخالق وصی دا تقریب نال خطاب۔
تفصیل مطابق پچھلے دیہاڑے ممبر آزاد جموں کشمیر سردار عبدالخالق وصی ایل ای 20پونچھ چار دے دورے اُتے یونین کونسل تھوراڑ پہنچے تے علاقہ واسیاں نے اوہناں دا چاہواں نال استقبال کیتا ۔ ایس موقعے تے اک تقریب دا پربندھ وی کیتا گیا۔ تقریب دے موقعے تے تھوراڑ، پوٹھی، لیوے، رتونا موڑہ تے کچھل دے 100توں ودھ خانداناں نے جموں کشمیر پیپلز پارٹی و مسلم کانفرنس توں مستعفی ہو کے مسلم لیگ (ن) وچ رلتی ہون دا اعلان کیتا۔ سردار عبدالخالق وصی دا تقریب نال خطاب کردے ہوئے کہنا سی کہ اوہناں دی حکومت آزاد کشمیر محمد نواز شریف دے ویژن مطابق کم کر رہی اے تے ساڈا مقصد کشمیر وچ گڈ گورننس لیان، میرٹ دی بحالی تے بغیر فرق دے لوکائی دی خدمت کرنا اے۔
