مردان،پشاور(پاکستان پوائنٹ نیوز02۔ستمبر2016ء) خیبرپختونخوا دے ضلع مردان وچ ضلع کچہری دے گیٹ اُتے آپ مارو دھماکے دے نتیجے وچ 14 بندے ہلاک جدکہ 41 زخمی ہو گئے۔ ڈی پی او مردان فیصل شہزاد دے حوالے نال دسیا گیا اے کہ آپ مارو حملے کرن والے نے پہلے دستی بم نال حملا کیتا تے فیر ضلع کچہری گیٹ اُتے اپنے آپ نوں اُڈا لیا۔ مردان دے ضلع ناظم حمایت اللہ مایار نے پرچا کاراں نال گل بات کردے ہوئے 10 بندیاں دے ہلاک تے 41 دے زخمی ہون دی تصدیق کیتی۔
ضلعی ناظم دے مطابق آپ مارو حملا آور نے پہلے دستی بم نال حملا کر کے راہ کلیئر کیتا تے فیر کچہری دے گیٹ اُتے اپنے آپ نوں دھماکے نال اُڈا لیا۔اوہناں نے دسیا کہ ایس علاقے وچ بہت زیادہ سکیورٹی ہوندی اے کیوں جے ایتھے کئی اہم سرکاری بلڈنگاں موجود نیں جدکہ ایتھے سکیورٹی کیمرے وی لگے ہوئے نیں۔ دوجے پاسے مردان آپ مارو حملے دی ذمے واری جماعت الاحرار نے قبول کیتی اے۔
خیبر پختونخوا حکومت دے ترجمان شوکت یوسفزئی نے دھماکے دی مذمت کردے ہوئے دسیا کہ واقعے دے زخمیاں وچ پولیس اہلکاراں سنے وکیل تے عام لوکائی شامل نیں۔ دھماکے دے زخمیاں نوں لاگے دے ہسپتال منتقل کر دِتا گیا، جدکہ سارے ہسپتالاں وچ ایمرجنسی لا دِتی گئی اے۔ وسیلیاں دے مطابق دھماکے دے بعد فائرنگ دیاں آوازاں وی سُنیاں گئیاں۔ دھماکے دی اطلاع ملدے ای ریسکیو اہلکار تے سکیورٹی فورسز وقوعا اُتے پہنچ گئے تے علاقے نوں گھیرے وچ لے لِتا۔
دھماکے دے بعد ضلع کچہری جان والے رستے بند کر دِتے گئے۔ کچہری روڈ مردان دا اک آبادی والا علاقا اے، جِتھے لوک وڈی گنتی وچ موجود ہوندے نیں۔ دوجے پاسے پشاور وچ ورسک روڈ اُتے واقع کالونی اُتے شدت پسنداں دے حملے دے بعد جوابی کارروائی وچ چار شدت پسند ہلاک ہو گئے نیں۔ پاکستان فوج دے شعبا تعلقات عاما دے ترجمان جنرل عاصم سلیم باجوہ نے اک ٹویٹ وچ دسیا کہ کرسچن کالونی اُتے حملے دے بعد سکیورٹی فورسز نے ویلے سِر کارروائی کیتی تے چاراں آپ مارو حملاکرن والیاں نوں ہلاک کیتا۔
آئی ایس پی آر نے دسیااے کہ حملا آور سویر ویلے اسلحے تے گوالا بارود دے نال کرسچن کالونی وچ وڑے تے پہلے سکیورٹی گارڈ نوں نشانا بنایا۔ حملے دے فوری بعد سکیورٹی فورسز نے علاقے نوں گھیرے وچ لے لیا تے فائرنگ دے تبادلے وچ حملا آوراں نوں ہلاک کر دِتا گیا۔ جدکہ فائرنگ دے تبادلے وچ دو ایف سی ، اک پولیس ، دو سویلین سکیورٹی گارڈ زخمی ہوئے نیں۔
یاد رہوے کہ پشاور وچ شدت پسند پہلے کئی وار عام شہریاں تے سکیورٹی اہلکاراں نوں نشانا بنا چکے نیں۔ ایس توں وکھ آرمی چیف جنرل راحیل شریف نے مردان میڈیکل کمپلیکس وچ آپ مارو دھماکے وچ زخمی ہون والیاں دی عیادت کیتی۔ ایس موقع اُتے چیف جسٹس پشاور ہائی کورٹ جسٹس مظہر عالم تے وزیر اعلا پرویز خٹک وی اوہناں دے نال سن۔ جنرل راحیل شریف مردان میڈیکل کمپلیکس پہنچے جِتھے اوہناں نے آپ مارودھماکے وچ زخمی ہون والیاں دی عیادت کیتی۔ ایس موقع اُتے پرویز خٹک وی موجود سن جدکہ بعد وچ عمران خان دی میڈیکل کمپلیکس پہنچے تے زخمیاں دی عیادت کیتی تے دھماکے وچ ہلاک تے زخمیاں ہون والیاں دے گھر والیاں نال ہرکھ دا وکھالا کیتا۔
