جڑانوالا(پاکستان پوائنٹ نیوز08۔دسمبر2017ء) تحریک انصاف دے چیئرمین عمران خان نے ماڈل ٹاؤن دُکھانت اُتے عوامی تحریک دی حمایت دا اعلان کردے ہوئے ڈاکٹر طاہر القادری دا اک وار فیر ساتھ دین دا اعلان کیتا اے، قادری صاحب تہانوں پیغام دے رہیا واں کہ اسیں تہاڈے نال آں، قوم سمجھ گئی اے کہ نواز شریف دا نظریہ کرپشن اے، نواز شریف ، شہباز شریف تے رانا ثناء اللہ نوں اڈیالا جیل پہنچاواں گے، نواز شریف ساہمنے اوہ بندہ کھلوتا اے جہدی کوئی قیمت نہیں، اسرائیل بنن دی سبھ توں ودھ مخالفت قائداعظم نے کیتی سی، سانوں اللہ دا شکر ادا کرنا چاہیدا کہ ساڈی حفاظت لئی ساڈے کول طاقتور فوج اے۔
اوہناں نے اج جڑانوالا وچ عوامی جلسے نال خطاب کردے ہوئے آکھیا کہ 1948وچ جدوں اسرائیل بن رہیا سی تے اسرائیل دی سبھ توں ودھ مخالفت قائداعظم محمد علی جناح نے کیتی سی۔ مسلماناں اُتے نہیں بلکہ انساناں اُتے ظلم ہو رہیا اے۔ اوہناں دا کہنا سی کہ جدوں اسرائیل بنیا تے فلسطین وچ 9فیصد یہودی سن پر اج 80فیصد یہودیاں دا قبضہ اے۔ تاریخ وچ مثال نہیں لبھدی کہ کسے قوم اُتے اینا ظلم کیتا گیا ہوئے۔
ایہدے توں ثابت ہو گیا اے کہ اقوام متحدہ کمزور ملک دی مدد نہیں کرن آؤندا۔ بوسنیا وچ وی مسلمان مارے گئے پر کسے نے مدد نہیں کیتی۔ اوہناں نے آکھیا کہ سانوں رب دا شکر ادا کرنا چاہیدا کہ ساڈے کول اک طاقتور فوج اے۔ جو ساڈی حفاظت کر سکدی اے۔ اوہناں نے آکھیا کہ اسرائیل شیعہ تے سُنیاں نوں لڑا کے ونڈن دی کوشش کرر ہیا سی۔ اوہ ایران تے عربیاں نوں لڑانا چاہندا سی۔
میرال دل آکھدا اے کہ ایہ جو امریکا نے کیتا اے کہ امریکا دے ایس کم دی وجہ توں دنیا دے مسلمان اکٹھے ہو جان گے۔ اوہناں نے آکھیا کہ تن ورھے پہلا ں ماڈل ٹاؤن وچ 14بندیاں نوں قتل کیتا گیا۔ اک گل یاد رکھنا جدوں کوئی قوم ظلم ساہمنے نہیں کھلوندی تے ظلم ودھدا جاندا اے۔ عمران خان نے آکھیا کہ شریف برادران نے دن دیہاڑے قتل کروائے۔ جے چُپ رہے تے ظلم ہور ہوئے گا۔
عمران خان نے طاہر القادری دی حمایت دا اعلان کردے ہوئے آکھیا کہ طاہر القادری جے سانوں سدن تے اسیں تیار آں۔ اوہناں نے آکھیا کہ رانا ثناء اللہ جو صرف قاتل نہیں بلکہ شکلوں وی قاتل لگدااے۔ عابد شیر علی دا والد آکھدا اے کہ رانا ثناء اللہ نے 18قتل کیتے۔ اوہ وی (ن) لیگی اے۔ رانا ثناء اللہ پنجابی فلماں وچ ولن دا کردار ادا کر سکدا اے۔
