اسلام آباد(پاکستان پوائنٹ نیوز02۔ستمبر2016ء) وفاقی دارلحکومت اسلام آباد دی انسداد دہشت گردی عدالت نے بیرسٹر فہد ملک قتل کیس دے مرکزی ملزم راجا ارشد نوں تِن دِناں جسمانی ریمانڈ اُتے پولیس دے حوالے کر دِتا۔ عدالت نے ڈاکٹری معائنے تے تفتیش مکمل کرن دے بعد آئندہ سنوائی اُتے ملزم نوں پیش کرن دا حکم وی دِتا۔ جمعے دے دیہاڑے بیرسٹر فہد ملک قتل کیس دی سنوائی انسداد دہشت گردی عدالت دے جج سید کوثر عباس زیدی نے کیتی۔
سنوائی دوران پولیس نے موقف اختیار کیتا کہ مرکزی ملزم نوں افغانستان فرار دی کوشش وچ طورخم بارڈر اُتے گرفتار کیتا گیا، ملزم توں تفتیش مکمل کرن لئی ہور جسمانی ریمانڈ دِتا جائے۔ عدالت نے پولیس دی درخاست اُتے راجا ارشد نوں ہور تن دِناں جسمانی ریمانڈ اُتے پولیس دے حوالے کر دِتا تے ہدایت کیتی کہ ملزم دا ڈاکٹری معائنا وی کروایا جائے۔ فاضل جج نے جسمانی ریمانڈ مکمل ہون اُتے ملزم نوں دوبارہ عدالت وچ پیش کرن دا وی حکم دِتا۔
