کراچی(پاکستان پوائنٹ نیوز07۔دسمبر2017ء) ائر چیف مارشل سہیل امان نے فضائی حد وچ وڑن والے امریکی ڈرونز نوں ڈیگن دا حکم دے دتا اے۔ اپنے اک بیان وچ اوہناں دا کہنا سی کہ پی اے ایف نوں پاکستان دی فضائی حد وچ داخل ہون والے امریکی سنے سارے ڈورنز ڈیگن دا حکم دے دتا اے۔ اسلام آباد وچ اک تقریب نال خطاب کردے ہوئے اوہناں نے آکھیا کہ کامرہ ائر بیس اُتے ہون والا حملا پی اے ایف (پاکستان ائر فورس) دی تاریخ دا بدترین تے بدقسمت حملا سی۔
اوہناں نے افغانستان توں ہون والے حملیاں بارے اک سوال دے جواب وچ آکھیا کہ پاک فضائیہ نے ملک وچ امن دی بحالی لئی اہم کردار ادا کیتااے۔ پاکستان دے امن وچ اوکڑاں پان والے ہمیشہ ناکام ہوئے نیں۔ ایتھوں تیکر کہ بھارتی جنگوواں نے وی ساڈیاں کامیابیاں نوں منیا اے۔ اوہناں دا کہنا سی کہ کامرہ ائر بیس اُتے حملے مگروں اسیں نہ صرف پاک فضائیہ نوں مضبوط کیتا بلکہ اسیں قوم نوں آپ مختیار ی ول وی ٹوریا۔ ائر چیف مارشل دا کہنا سی کہ پاکستان ہن اپنے جنگی جہاز آپ تیار کرے گا۔ اوہناں نے آکھیا کہ اسیں ایس معاملے اُتے بہت بدقسمت آں کہ ساڈے گوانڈھی ملک ای سانوں نقصان اپڑا رہے نیں۔ بھارت ساڈا مڈھوں دشمن اے تے کامرہ ائر بیس حملے پچھے بھارت دا ای ہتھ سی۔
