لاہور(پاکستان پوائنٹ نیوز07۔دسمبر2017ء) پیپلز پارٹی دے مرکزی رہنما قمر زمان کائرہ نے واضح کیتا اے کہ مسلم لیگ (ن) تے نواز شریف خلاف کوئی اتحادنہیں بن رہیا، سیاسی اتحاد بندے رہندے نیں، عمران خان رقص تے دھمال وچ فرق نہیں جاندے، خان صاحب نے ہن ساڈے کلچر اُتے حملے شروع کر دتے نیں، رپورٹ مطابق ذمے واراں نوں سزا ہونی چاہیدی، شکر اے کہ حمزہ شہباز وی ساہمنے آ گئے نیں۔
اوہناں نے اج میڈیا نال گل بات کردے ہوئے آصف زرداری تے طاہر القادری دی ممکنہ ملاقات بارے آکھیا کہ سیاست وچ سیاسی اتحاد بندے رہندے نیں، مسلم لیگ (ن) تے نواز شریف خلاف کوئی اتحاد نہیں بن رہیا۔ پیپلز پارٹی سبھ نوں نال کے لے ٹُرن اُتے زور دیندی اے۔اوہناں دا کہنا سی کہ ساریاں جماعتاں پاناما کیس وچ نواز شریف خلاف بہت چھیتی وچ سن پر پیپلز پارٹی نے آکھیا کہ اجے انتظار کرو۔
پر نواز شریف اپنے جھوٹھاں دا شکار ہوئے۔ اوہناں نے آکھیا کہ عمران خان اپنی گل بات وچ شائستگی پیدا کرن۔ عمران خان رقص تے دھمال وچ فرق نہیں جاندے۔ دھمال ساڈی روایت اے۔ طالبان خان دے اُستاد مذہب اُتے حملے کردے نیں جدکہ خان صاحب نے ساڈے کلچر اُتے حملے شروع کر دتے نیں۔ مرکزی رہنما پیپلز پارٹی نے ماڈل ٹاؤن دُکھانت دی رپورٹ بار ے آکھیا کہ ذمے واراں نوں سزا ملنی چاہیدی۔ ذمے واراں خلاف مقدمے وی درج ہونے چاہیدے۔
