کُھلے دُدھ اُتے مکمل پابندی، متبادل پاسچرائزیشن عمل لاگو کرن لئی تیاریاں جاری

کُھلے دُدھ اُتے مکمل پابندی، متبادل پاسچرائزیشن عمل لاگو کرن لئی تیاریاں جاری

لاہور(پاکستان پوائنٹ نیوز06۔دسمبر2017ء)پنجاب فوڈ اتھارٹی نے کُھلے دُدھ اُتے مکمل پابندی لاندے ہوئے متبادل پاسچرائزیشن عمل لاگو کرن لئی تیاریاں شروع کر دتیاں نیں، ایس سلسلے وچ پنجاب فوڈ اتھارٹی و یونیورسٹی آف ویٹنری اینڈ اینیمل سائنسز دے آہر ہیٹھ پاسچرائزیشن دے حوالے نال مشاورتی اجلاس دا انعقاد کیتا گیا جہدے وچ کُھلے دُدھ اُتے پابندی دی تائیدتے پاسچپرائزیشن عمل اپنان بارے سارے سٹیک ہولڈرز نے اپنا کردار ادا کرن اُتے اتفاق کیتا۔

مشاورتی اجلاس پاسچرائزیشن عمل نوں ای کُھلے دُدھ دا واحد متبادل مَندے ہوئے پنجاب فوڈ اتھارٹی پاسچرائزیشن قانون دی مکمل تائید کیتی گئی تے آؤندے پنج ورھیاں وچ کُھلے، غیر معیاری دُدھ اُتے پابندی لان دی حمایت کیتی گئی۔اجلاس دی صدارت ڈائریکٹر جنرل پنجاب فوڈ اتھارٹی نورالامین مینگل و وائس چانسلر یونیورسٹی آف ویٹنری اینڈ اینیمل سائنسز پروفیسر ڈاکٹر طلعت محمود پاشا نے کیتی۔

اجلاس وچ ملک انڈسٹری بشمول نیسلے، اینگرو، حلیب، ملک پیک، فارمر ایسوسی ایشنز، پیکنگ انڈسٹری تے ہور ماہراں نے رلت کیتی۔ایس حوالے نال ڈی جی فوڈ اتھارٹی نورالامین مینگل دا کہنا سی کہ پاسچرائزیشن دا عمل ای کُھلے دُدھ دا واحد متبادل اے جہدے راہیں لوکائی نوں خالص، صحت مند تے معیاری دُدھ دی فراہمی ممکن اے۔ پاسچرائزڈ دُدھ اُبال کے پیک کیتا جاندا اے تے محفوظ طریقے نال لوکاں تیکر اپڑدا اے۔