کوئٹہ(پاکستان پوائنٹ نیوز02۔دسمبر2017ء) پاکستان مسلم لیگ (ن) دے صدر و سابق وزیر اعظم میاں نواز شریف نے آکھیا کہ ملک وچ پچھلے 70ورھیاں توں مائنس پلس دا بڑا کھیڈ ہو گیا اے، ووٹ دے تقدس نوں بحال کرو، آمراں توں پی سی او دا حلف لین والے صادق و امین دا فیصلا کرن گے؟ احتساب دے ناں اُتے نواز شریف توں انتقام لیا گیا اے، میری سیاست نظریے تے رہوے گی، احتساب لئی 6بہترین ہیرے چُن کے جے آئی ٹی بنائی گئی، پر لوکائی نے ایہ فیصلا رد کر دتا، کرکٹر خان توں پشاور وچ میٹرو نہیں بن سکی، اسیں کوئٹہ وچ میٹروبس بناواں گے۔
اوہناں نے کوئٹہ وچ جلسے نال خطاب کرد ے ہوئے آکھیاکہ میری سکیورٹی اللہ دے ہتھ وچ اے۔ بلٹ پروف شیشہ ہٹایا جائے۔ اوہناں دا کہنا سی کہ شیشہ ایس لئی ہٹوایا کہ تُسیں چنگی طرحاں مینوں ویکھو لوو۔ نواز شریف دا کہنا سی کہ کوئٹہ والیاں وچ قانون دی حکمرانی کُٹ کُٹ کے بھری اے۔ اوہناں نے ہمیشہ آمریت دا مقابلا کیتا اے۔ بلوچستان دے لوک سچے تے کھرے نیں ہر آزمائش تے مشکل وچ پورا ساتھ دیندے نیں۔
نواز شریف دا اپنے خطاب دوران کہنا سی کہ ایتھوں دے لوکاں نے کدی پاکستانی جھنڈا نیواں نہیں ہوندا دتا۔ احتساب دے ناں اُتے میرے توں انتقام لیا گیا اے۔ چار ورھیاں وچ کرپشن دا کوئی سکینڈل ساہمنے نہیں آیا۔ اک پیسے دی کرپشن نہیں کیتی، جے کیتی تے دسیا جائے پر فیر وی کڈھ دتا گیا۔ نواز شریف نے آکھیاکہ پُتر دی کمپنی توں تنخاہ نہیں لئی تے ایہدے اُتے کڈھ دتا گیا۔
ایہ وی کوئی فیصلا سی؟ ایہ فیصلا کون دے رہے نیں ہو ہمیشہ پی سی او دے تحت آمراں توں حلف لیندے نیں۔ اوہ مینوں آکھ رہے نیں کہ تُسیں صادق تے امین نہیں او۔ اوہناں نے آکھیا کہ احتساب لئی 6بہترین ہیرے چُنے گئے ، اوہناں دی جے آئی ٹی بنائی گئی۔ اک ای بنچ نے وار وار فیصلے کیتے۔ کدی دو کدی تن تے کدی 5ججاں نے فیصلا دتا۔ شاید پاکستان دی تواریخ وچ اجیہا فیصلا نہیں ہویا۔ اک پیسے دی کرپشن دا الزام ثابت نہیں ہویا۔ کسے سرکاری پیسے وچ کرپشن دا الزام نہیں اے۔ اوہناں نے آکھیا کہ 2018وچ لوکائی فیصلا سنا کے سانوں سرخرو کرے گی۔ لوکائی نال وعدہ اے جے مُڑ موقع ملیا تے کوئٹہ نوں پاکستان دا مثالی شہر بناواں گے، جو کراچی‘ لاہور‘ اسلام آباد تے پشاور توں گھٹ نہیں ہوئے گا۔
