اسلام آباد(پاکستان پوائنٹ نیوز28۔نومبر2017ء) وزیر اعظم شاہد خاقان عباسی شہباز شریف راہیں نواز شریف توں گل منواندے نیں۔نجی ٹی وی چینل نال گل بات کردے ہوئے سینئر پرچکار و تجزیا نگار سہیل وڑائچ نے آکھیا کہ (ن) لیگ دی وفاقی و صوبائی حکومت دی سوچ وچ فرق اے۔ اوہناں نے آکھیا کہ شہباز شریف کئی وار میٹنگز وچ وی بہت سارے مشیراں تے لوکاں بارے آکھ چکے نیں۔
شہباز شریف شروع توں ای چاہندے سن کہ کسے دی قربانی دتی جائے پر میاں نواز شریف ایہدے لئی تیار نہیں سن۔ جہدے مگروں شہباز شریف نے اک ملاقات وچ زاہد حامد نوں منایا تے اوہناں نوں استعفا دین لئی راضی کیتا تے اوہ تیار ہو گئے۔ اوہناں دا کہنا سی کہ انج لگدا اے کہ شاہد خاقان عباسی بے شک بُہتی نواز شریف دی مَندے نیں پر اوہ بُہتا راضی شہباز شریف دی گل نال ہوندے نیں، ایس لئی اوہ اپنیاں کئی گلاں شہباز شریف راہیں ای نواز شریف تیکر اپڑاندے نیں۔
سہیل وڑائچ دا کہنا سی کہ جے کوئی ایہ سمجھدا اے کہ ایس اختلاف رائے نال (ن) لیگ وچ دراڑ آ جائے گی تے انج نہیں ہوئے گا کیونکہ دراڑ آن دا ویلا لنگھ گیا اے، ہن ایہ آپشن ای موجود نہیں اے کہ کوئی دراڑ آجائے۔ اوہناں دا کہناسی کہ مسلم لیگ (ن) وچ جو وی فارڈو بلاک بنے گا اوہدے وچ شہباز شریف نہیں ہونگے تے نہ ای اوہناں دے ہون دی آس اے۔
