امریکا(پاکستان پوائنٹ نیوز28۔نومبر2017ء) ہیج فنڈ دے لیجنڈ مائیک نووگراٹنر دا کہنا اے کہ 2018دے آخیر تیکر ورچوئل کرنسی بٹ کوائن دی قیمت 40ہزار ڈالر تیکر اپڑ جائے گی۔ اوہناں نے آکھیا کہ بٹ کوائن دی قیمت آؤندے 13مہینیاں وچ تقریبن چار گنا توں ودھ سکدی اے۔ پچھلے پیر نوں بٹ کوائن دی قیمت 9ہزار 656ڈالر سی۔ ایس ویلے انٹرنیٹ دنیا دی ایس کرنسی دے اک یونٹ یاں اِنج آکھ لوو کہ اک سکے دی قیمت 9ہزار 656ڈالر (10لکھ17ہزار 983رُپئے توں ودھ) ہو گئی اے۔
یعنی اک بٹ کوائن نال 20تولے سونا مُل لیا جا سکدا اے۔ ایس توں پہلاں بٹ کوائن دی قیمت 3ہزار ڈالر وی سی تے کرنسی وچ ایہ وادھا اوس ویلے ساہمنے آیا اے جدوں پچھلے ورھے ایہنوں دو حصیاں وچ ونڈیا گیا سی اتے دوجی کرنسی نوں بٹ کوائن کیش دا ناں دتا گیا۔ ایہ نویں کرنسی اکو ویلے 223ڈالرز وچ ویچی گئی سی، جہدی مارکیٹ ویلیو پنج ارب ڈالرز سی جدکہ بٹ کوائن دی مارکیٹ ویلیو 55ارب ڈالر توں ودھ گئی اے۔
مزے دی گل ایہ اے کہ بٹ کوائن دی قیمت پچھلے ورھے مئی وچ صرف 443ڈالرز سی تے اک سال وچ اینا وادھا حیرانگی دی گل اے۔ ایہ بٹ کوائن لئی اک نیل پتھر اے کیونکہ اوہنوں ڈیجیٹل گولڈ وی قرار دتا جاندا اے۔ کسے حقیقی کرنسی د ے مقابلے وچ بٹ کوائن ہر طرحاں دے ضابطیاں یاں حکومتی کنٹرول توں آزاد اے۔ تے اوہدی ورتوں بہت آسان اے۔ ایس ویلے ایہنوں کئی ملک کینیڈا‘ چین تے امریکا وغیرہ وچ ورتیا جا رہیا اے پر دنیا وچ انٹرنیٹ تیکر پہنچ رکھن والا ہر بندہ ایس کرنسی نوں مُل لے سکدا اے۔
