اسلام آباد(پاکستان پوائنٹ نیوز15۔نومبر2017ء) پاکستان مسلم لیگ (ن) دے صدر و سابق وزیر اعظم نواز شریف نے آکھیا اے کہ وکیلاں نوں جمہوریت تے ووٹ دے تقدس لئی نال لے کے ٹُراں گے، میرے اصولی موقف تے کوششاں دا فائدہ لوکائی نوں ہوئے گا، پاکستان وی اک کالے کوٹ والے قانون دان نے بنایا سی، ملکی استحکام لئی جمہوریت تے مضبوط ادارے ضروری نیں، دہشت گردی تے بجلی دی لوڈشیڈنگ نوں ختم کر دتا اے۔
تفصیل مطابق اوہ اج پنجاب ہاؤس اسلام آباد وچ ملاقات کرن والے سابق صدر و سپریم کورٹ بارتے پاکستان بار کونسل دے عہدیداراں تے وکیلاں نال گل بات کر ررہے سن۔ نواز شریف نے آکھیا کہ ملک وچ عدلیہ بحالی لئی وکیلاں نال رلکے لانگ مارچ انصاف و قانون دی اُچیائی لئی کیتا سی۔ انصاف دا حصول ہر شہری دا بنیادی حق اے۔ اوہناں نے آکھیا کہ وکیلاں دی جمہوریت لئی کئی قربانیاں نیں۔
پاکستان اک کالے کوٹ والے قانون دان نے بنایا سی۔ وکیلاں نوں جمہوریت دے استحکام تے ووٹ دے تقدس لئی نال لے ٹُراں گے۔ ملکی استحکام لئی جمہوریت تے مضبوط ادارے ضروری نیں۔اوہناں نے آکھیا کہ میریاں کوششاں ووٹ دے تقدس لئی ہون گیاں۔ میرے اصولی موقف تے کوششاں دا فائدہ لوکائی نوں ہوئے گا۔ نواز شریف دا کہنا سی کہ پاکستان توں دہشت گردی تے بجلی دی لوڈشیڈنگ دا خاتمہ کر دتا اے۔ ایس موقعے تے وکیلاں نے نواز شریف نوں یقین دوایا کہ ملک وچ جمہوریت تے ووٹ دے تقدس لئی اسیں تہاڈے نال آں۔
