اسلام آباد(پاکستان پوائنٹ نیوز14۔نومبر2017ء) تحریک انصاف دے چیئرمین عمران خان نے خیبرپختونخوا وچ آؤندے 5ورھیاں وچ دو ارب ہور رُکھ لان دا اعلان کر دتا اے۔ اوہناں نے آکھیا کہ خیبر پختونخوا وچ پولی تھن بیگز ختم کر کے ری یوزایبل بیگز لیاواں گے‘ اگلیاں گرمیاں توں پہلے چار بل سٹیشن بناواں گے‘ آؤندے ویلے وچ سارے صوبیاں اندر تحریک ا نصاف دی حکومت ہوئے گی، ماحولیاتی آلودگی دوجے صوبے وی گھٹ کرن۔
اوہناں نے اج تقریب نال خطاب کردے ہوئے آکھیا کہ بلین ٹری منصوبہ ملک لئی ضروری سی۔ قبضہ مافیا نے تھاں تھاں قبضہ کیتا ہویا سی۔ مافیا نے دو ارب رُپئے دے درخت وڈھے جہدا مطلب اے کہ جنگل ختم کیتے گئے۔ عمران خان دا تقریب نال خطاب کردے ہوئے کہنا سی کہ منصوبہ شروع کرن اُتے مذاق اُڈایا گیا کہ نرسری ای نہیں تے درخت کتھوں آن گے۔ بلین درخت لاکے اجیہا کارنامہ انجام دتا کہ تہانوں پتا ای نہیں کہ ایہ کِنا وڈا کارنامہ اے۔
اوہناں نے مخالفاں نوں تنقید دا نشانہ بناندے ہوئے آکھیا کہ ترکی توں لوکاں نوں صفائی لئی لیاندا جا رہیا اے۔ پر ایہ ترکی دی بیورو کریسی نہیں بلکہ پاکستان دے لوک نیں۔ جے سیاسی عزم تے سیاسی مداخلت نہ ہوندی تے کوئی وی کم ناممکن نہیں۔ اوہناں نے آکھیا کہ خیبرپختونخوا دے لوکاں نے کم کر کے وکھایا ایہ ترکی توں درآمد بیورو کریسی نہیں۔عمران خان دا کہنا سی کہ حکومت اودوں تیکر کوئی کم کامیابی نال نہیں کر سکدی جدوں تیکر لوک ساتھ نہ دین۔
درخت لان لئی لوکاں نے نرسیاں لائیاں جہدے توں اوہناں نوں روزگار ملیا۔ اک ارب 18کروڑ درخت لانا معمولی نہیں، جے کسے نوں شک اے تے آ جائے اسیں اوہنوں لگے ہوئے رُکھ وکھا دینے آں۔عمران خان دا کہنا سی کہ ترقی اشتہاراں وچ نہیں زمین اُتے ہوندی اے۔ عمران خان نے آکھیاکہ خیبر پختونخوا وچ دنیا دا وڈا ریزر و فاریسٹ اُگاواں گے۔
