فیصل آباد(پاکستان پوائنٹ نیوز30۔اگست 2016ء) صوبائی وزیر قانون رانا ثناء اللہ نے آکھیا کہ عمران خان دا سسرال ایجنڈا ناکام ہووے گا، اوہناں نوں رسوائی دے سوا کُجھ نہیں ملنا، اوہناں نے آکھیا کہ خان صاحب 2018 دے وچ ہار دے بعد اپنی باقی دی زندگی سوہرے گھر لنگھان گے، چودھری پرویز الہی تے شیخ رشید دی تے سیاست ختم ہو گئی اے ہُن دوجیاں دی سیاست ختم کرنا چاہندے نیں۔
منگل نوں صوبائی وزیر قانون رانا ثناء اللہ نے میڈیا نال گل بات کردے ہوئے آکھیا کہ بھٹھہ مزدورتے چائلڈ لیبر دے حوالے نال قانون بہت ضروری اے، ایس قانون نال غریب بندیاں دی مدد وی ہووے گی، اپوزیشن ارکارن معزز ایوان دیاں روایتاں دی پاسداری کرن، وسیم اخترجے آئینی تقاضے دے مطابق ٹھیک نیں تے اوہناں نوں حلف چُکن دا پورا حق حاصل اے۔ رانا ثناء اللہ نے آکھیا کہ خان صاحب دا سسرال ایجنڈا ناکام ہووے گا۔
اوہناں نوں رسوائی دے سوا کُجھ نہیں لبھے گا، اوہناں نے آکھیا کہ عمران خان 2018 وچ ہارن دے بعد سوہرے گھر چلے جان گے، عمران خان 2018 دے بعد وی احتجاج کرن گے تاں جے ملک ترقی نہ کر سکے۔ اوہناں دا ہور کہنا سی کہ چودھری پرویز الہی تے شیخ رشید دی سیاست ختم ہو گئی اے، پرویز الہی تے شیخ رشید ہُن دوجیاں دی وی سیاست ختم کرانا چاہندے نیں۔ اوہناں نے آکھیا کہ وزیر اعظم نواز شریف دی قیادت وچ ملک ترقی کردا رہوے گا۔
