اسلام آباد(پاکستان پوائنٹ نیوز30۔اگست 2016ء) قومی اسمبلی دی پارلیمانی کمیٹی دے ارکان نے دانش کنیریا اُتے انگلش کرکٹ بورڈ ولوں پوری زندگی لئی پابندی خلاف کردار ادا نہ کرن اُتے پی سی بی نوں تنقید دا نشانا بناندے ہوئے آکھیا کہ لیگ سپنر نوں ہندو ہون پاروں تعصب دا نشانا بنایا گیا اے۔ تفصیل دے مطابق قومی اسمبلی دی سٹینڈنگ کمیٹی برائے بین الصوبائی رابطے دے رکن رمیش وانکوانی نے اجلاس دے دوران آکھیا کہ پی سی بی، دانش کنیریا نوں ہندو ہون پاروں قانونی تے مالی مدد فراہم نہیں کر رہیا، پی سی بی حکام کنیریا نال ہور کھڈاریاں وانگ سلوک وی نہیں کر رہیا جہدے پاروں اوہنوں اپنا مقدما آپ لڑنا پے رہیا اے۔
اوہناں نے آکھیا کہ کنیریا نال کرکٹ بورڈ دے اعلا حکام ولوں تعصب ورتیا جا رہیا اے۔جدکہ کمیٹی دے رکن اقبال محمد علی نے موقف دی حمایت کردے ہوئے آکھیا کہ لیگ سپنر دی مالی حیثیت کمزور اے تے اوہ کیس اپنے طور اُتے نہیں لڑ سکدے، کنیریا آپ وی ایہ آکھ چکیا اے کہ اوہدے نال صحیح ورتارا نہیں کیتا گیا کیوں جے اوہ ہندو اے۔ اقبال محمد علی نے پی سی بی حکام اُتے زور دِتا کہ لیگ سپنر نوں تاحیات پابندی خلاف مقدما لڑن لئی مالی تے قانونی مدد دِتی جائے۔ یاد رہوے کہ انگلش کرکٹ بورڈ نے دانش کنیریاں نوں 2009 وچ کاؤنٹی سیزن دے دوران سپاٹ فکسنگ تے ساتھی کھڈاریاں مارون ویسٹ فیلڈ نوں ایس لئی اکسان دے الزام اُتے پوری زندگی لئی کرکٹ کھیڈن اُتے پابندی لا دِتی گئی سی۔
