اسلام آباد(پاکستان پوائنٹ نیوز29۔اگست 2016ء) پاکستان تحریک انصاف نے پاناما لیکس اُتے سپریم کورٹ وچ پٹیشن دائر کر دِتی۔ درخاست وچ وزیر اعظم نواز شریف تے اوہناں دے خاندان سنے سیکرٹری داخلا قانون، نیب تے ایف بی آر نوں وی فرق بنایا گیا اے درخاست وچ آکھیا گیا اے کہ وزیر اعظم نواز شریف نے آکھیا کہ پراپرٹی 2005 وچ خریدی سی۔ جدکہ وزیر اعظم نے لندن وچ پراپرٹی 1993 تے 1996 وچ لئی جدکہ پاناما لیکس دیاں تحقیقات لئی سپریم کورٹ دی مداخلت ضروری اے۔
درخاست وچ آکھیا گیا کہ قومی دولت غیر قانونی طریقے نال باہر گھل کے آف شور کمپنیاں بنائیاں گئیاں جدکہ آف شور کمپنیاں اُتے وزیر اعظم نواز شریف تے اوہناں دے بالاں دے بیاناں وچ تضاد اے۔ وزیر اعظم نواز شریف نے 2013 دے الیکشن وچ مریم نواز تے ہور بالاں نوں زیر کفالت ظاہر کیتا۔ جائیداد مریم نواز تے حسین نواز دی اے تے اثاثیاں وچ ظاہر کیوں نہیں کیتا گیا۔ درخاست وچ استدعا کیتی گئی کہ وزیر اعظم نواز شریف تے اوہناں د ے گھر والیاں دا ناں ای سی ایل وچ شامل کیتا جائے ۔
