اسلام آباد(پاکستان پوائنٹ نیوز29۔اگست 2016ء) سپریم کورٹ آف پاکستان نے فوجی عدالتاں توں سزا یافتا پشاور دے آرمی پبلک سکول سنے دہشت گردی دے کئی واقعیاں وچ ملوث 16 مجرماں دی موت دی سزا خلاف اپیلاں رد کر دِتیاں۔ 16 دہشت گرداں نے فوجی عدالتاں دے فیصلے نوں سپریم کورٹ وچ چیلنج کیتا سی، آرمی چیف جنرل راحیل شریف پہلے ای سارے دہشت گرداں دیاں اپیلاں رد کر چکے نیں۔
تفصیل دے مطابق چیف جسٹس انور ظہیر جمالی دی سربراہی وچ جسٹس امیر ہانی مسلم، جسٹس شیخ عظمت سعید، جسٹس منظور احمد ملک تے جسٹس فیصل عرب اُتے مشتمل سپریم کورٹ دے 5 رکنی لارجر بنچ نے چالو ورھے 20 جون نوں ذکر کیتے گئے کیس نوں محفوظ کیتا سی جو پیر دے دیہاڑے سنایا گیا۔ سپریم کورٹ دے 182 صفحیاں اُتے مشتمل تفصیلی فیصلے نوں جسٹس انور ظہیر جمالی نے پڑھ کے سنایا۔
اپنے فیصلے وچ عدالت نے قرار دِتا کہ فوجی عدالتاں دے فیئر ٹرائل دے سارے ضابطے پورے کیتے گئے تے مجرماں نوں وکیل دفاع فراہم کیتا گیا۔ فیصلے وچ آکھیا کہ قانون اے کہ اعلا فوجی عدالتاں دے ثبوت دا جائزا نہیں لیا جا سکدا، درخاست گزاراں دے وکیلاں نے ٹرائل وچ ضابطے توں انحراف دی نشان کاری نہیں کیتی، ایس لئی نہ تے ایہ آکھیا جا سکدا اے کہ فوجی عدلاتاں دے فیصلے ناکافی ثبوت یاں کمزو ر ثبوتاں اُتے مبنی سن، سارے ثبوت تے سزاواں آرمی ایکٹ دے تحت دِتیاں گئیاں۔
فیصلے وچ آکھیا گیا کہ فوجی عدالت دے کسے رکن اُتے بد نیتی ثابت نہیں ہوئی۔ یاد رہوے کہ فوجاں عدالتاں دے حکم نوں عدالت عظمی وچ چیلنج کرن والیاں وچ آرمی پبلک سکول پشاور، پریڈلین تے بنوں جیل وچ حملیاں وچ ملوث دہشت گردد شامل سن۔تے جہڑے دہشت گرداں دیاں اپیلاں رد کیتیاں گئیاں اوہناں وچ قاری زبیر، حیدر علی، قاری ظاہر گل، عتیق الرحمان، تاج محمد، اقسن محمود، فتح محمد، شیر عالم، فیض محمد، محمد عربی، محمد غوری، طاہر محمود، فضل غفار، سعید الرزماں تے سخی محمود شامل نیں۔
