اسلام آباد(پاکستان پوائنٹ نیوز19۔اکتوبر2017ء) سابق وزیر اعظم نواز شریف‘ اوہناں دی دھی مریم صفدر تے اوہناں دے داماد کیپٹن (ر)صدر اُتے اج احتساب عدالت اندر فرد جرم لا دتی گئی پر ملزماں نے جرم قبول کرن توں انکار کرد تا۔تفصیل مطابق نجی ٹی وی چینل دے پروگرام اُتے مشہور تجزیا کار سلیم صافی نے آکھیا کہ مسئلا ایہ اے جہدے کول اختیار اے اوہ کوئی منصفانہ نظام نہیں بناندا تے جدوں ایہ لوک آپ پھس جاندے نیں تے ایہناں نوں قانون بدلن دا خیال آ جاندا اے۔
پچھلے چار ورھیاں وچ نواز شریف نے نیب بارے قانون ول کوئی دھیان نہیں دتا پر ہن اوہناں دی حکومت ایہناں قوانین وچ تبدیلی دا سوچ رہی اے۔ اوہناں نے آکھیا کہ اجے خیبرپختونخوا وچ شیخ رشید دے دوست عمران خان کول اختیار اے‘ وفاق وچ تے حکومت و اپوزیشن دی مشاورت نال نیب دا چیئرمین متھیا جاندا، جدکہ خیبر پختونخوا تے اوہناں نے اپنا بندہ کڈھیا سی، تے جیویں ای صوبائی نیب چیئرمین نے کم کرن دی کوشش کیتی تے جنرل حامد نوں گھر گھل دتاگیا۔
تے اج ڈیڈھ سال ہو گیا دوجا نیب چیئرمین اجے متھیا نہیں گیا۔ کیونکہ اوہناں نوں پتا اے جے نیب چیئرمین نے صحیح کم کیتا تے پرویز خٹک وی اندر ہو سکدے نیں تے عمران خان وی۔ اوہناں دا کہنا سی کہ اسیں جے سی پیک دے معاملات نوں ویکھیے تے سوال اُٹھدا اے کہ سی پیک بارے تفصیلاں نوں ساہمنے کیوں نہیں لیاندا جا رہیا۔ سلیم صافی نے آکھیا کہ جس دن سی پیک ڈیل کرن والیاں دے اعمال ساہمنے آ گئے تے اسیں سارے پاناما نوں بھل جاواں گے۔
