اسلام آباد(پاکستان پوائنٹ نیوز17۔اکتوبر2017ء) چیئرمین نیب جسٹس (ر) جاوید اقبال نے لا پرواہی دا وکھالا کرن والے افسراں نوں جھاڑدے ہوئے آکھیا اے کہ کرپٹ افسر اں دی نیب وچ کوئی تھاں نہیں، نیب وچ اندرونی احتساب دا عمل شروع کر دتا اے‘ میرے سنے نیب دا کوئی وی افسر قانون توں اُچا نہیں اے۔ میڈیا رپورٹس مطابق جسٹس (ر) جاوید اقبال نے اج اجلاس دی صدارت کیتی۔
اجلاس دوران نیب وچ پرانے سنوائی لئی پئے کیساں تے نیب بجٹ سنے افسراں دی کم کاری دا جائزہ لِتا گیا۔ ایس موقعے تے چیئرمین نیب جسٹس (ر) جاوید اقبال نے لا پرواہی کرن والے کئی نیب افسراں نوں جھاڑیا۔ اوہناں نے آکھیا کہ نیب وچ 17ورھیاں توں پئیاں شکایتاں اُتے کارروائی کیوں نہیں کیتی گئی؟ کئی کیساں اینا چِر لنگھن مگروں وی چل رہے نیں۔ چیئرمین نیب نے آکھیا کہ قانون دی خلاف ورزی کرن والے افسراں و اہلکاراں خلاف چھیتی کارروائی کیتی جائے گی۔
