راولپنڈی(پاکستان پوائنٹ نیوز11۔اکتوبر2017ء) چیف آف آرمی سٹاف جنرل قمر جاوید باجوہ نے آکھیا اے کہ اخبار وچ ہیڈ لائنز مگروں بزنس تے معیشت دا صفحہ پڑھنا واں‘ انفراسٹرکچر تے توانائی بہتر ہوئی پر کرنٹ اکاؤنٹ بیلنس حق وچ نہیں اے‘ گروتھ اُتے جا رہیا اے پر قرضے آسمان نال گل بات کر رہے نیں‘ کشکول توڑنا اے تے ٹیکس تے جی ڈی پی دی شرح وچ وادھا کرنا پئے گا ‘ ملک دی داخلی تے خارجی سلامتی دا ذمے وار آں۔
آرمی چیف نے اج کراچی وچ آئی ایس پی آر دے آہر ہیٹھ’ اکانومی اینڈ سکیورٹی‘ دے سرناویں ہیٹھ سیمینار نال خطاب کردے ہوئے آکھیا کہ معیشت ساڈی زندگی دے ہر پہلو نال جڑی اے۔ اخبار وچ ہیڈ لائنز ویکھن مگروں بزنس تے معیشت دا صفحہ پڑھنا واں۔ آرمی چیف دا کہنا سی کہ سکیورٹی تے معیشت دا ڈونگھا تعلق اے۔ بہتر معیشت اداریاں دے استحکام تے قومی صحت دی عکاس اے۔
معیشت دان ہوندا تے آکھدا کہ معاشی استحکام سبھ توں وڈی ترجیح ہونی چاہیدی۔ آؤندے ویلے نوں محفوظ بنان لئی مشکل فیصلے کرنے پین گے۔ آرمی چیف نے آکھیا کہ کشکول توڑنا اے تے ٹیکس تے جی ڈی پی دی شرح وچ وادھا کرنا پئے گا۔ معاشی پالیسیاں وچ تسلسل تے ٹیکس نیٹ ودھانا پئے گا۔ اکانامی رلے ملے اشارے دے رہی اے۔اوہناں دا کہنا سی کہ گروتھ اُتے جا رہی اے پر قرضے آسمان نال گل کر رہے آں۔
انفراسٹرکچر تے توانائی بہتر ہو رہی اے ۔ اوہناں نے آکھیا کہ دو دہاکیاں توں سکیورٹی ریاست دا مرکزی کم بن گیا اے۔ جدکہ پچھے دو دہاکیاں توں مختلف عالمی نظریات وچ تبدیلی آئی اے۔ مضبوط معیشت نے جارحیت دا وی مقابلاکیتا اے۔ اوہناں نے آکھیا کہ روس کمزور اقتصادی حالات کارن ٹُٹیا۔ روس کول ہتھیاراں دی کمی نہیں سی بلکہ روس معیشت دی کمزوری کارن ٹُٹیا۔
