بجلی دی قیمت وچ 1روپیہ 81پیسے فی یونٹ کمی

اسلام آباد(پاکستان پوائنٹ نیوز02۔اکتوبر2017ء) بجلی دی قیمت وچ اک مہینے لئی 1روپیہ 81پیسے فی یونٹ کمی کر دتی گئی اے۔ نیپرا ولوں جاری اعلامیے مطابق قیمت وچ کمی اگست دے فیول پرائس ایڈجسٹمنٹ دے تحت کیتی گئی اے۔ نیپرا مطابق کے الیکٹرک تے 300یونٹ ورتن والے ورتیندڑاں نوں ایس حوالے نال کوئی ریلیف نہیں ملے گا۔ نیپرا مطابق اگست وچ بجلی دی پیداواری لاگت 4رُپئے 63پیسے فی یونٹ رہی جدکہ ورتیندڑاں نے اگست وچ 6رُپئے 46پیسے فی یونٹ دے حساب نال بل جمع کروایا۔ نیپرا ولوں جاری اعلامیے مطابق ورتیندڑاں نوں اکتوبر دے بِلاں وچ 20ارب توں ودھ ریلیف ملے گا۔