نیویارک(پاکستان پوائنٹ نیوز24۔اگست 2016ء) اقوام متحدہ وچ پاکستان دی مستقل مندوب ملیحہ لودھی نے آکھیا اے کہ پاکستان بھارت نال ایٹمی دھماکے نہ کرن دا دو پاسی سمجھوتا کرن دی خاہش رکھدا اے۔ تفصیل دے مطابق اقوام متحدہ وچ پاکستان دے مستقل مندوب ملیحہ لودھی نے سلامتی کونسل دے آہر ہیٹھ اک مباحثے نال گل بات کردے ہوئے آکھیا کہ پاکستان ایٹمی عدم کھلار بارے واضح قانوناں اُتے عمل کرے گا جدکہ پاکستان ایٹمی کھلار دی ذمے واریاں چنگے طریقے نال پوریاں کر ہیاں اے تے ایس سلسلے وچ پاکستان نے ایٹمی تحفظ و سلامتی یقینی بنان لئی مثالی اقدامات کیتے نیں، اوہناں نے آکھیا کہ نیو کلیئر سپلائرز گروپ وچ توسیع دی شرط اُتے مبنی غیر امتیازی عمل دی لوڑ اے، پاکستان دے کاغذات گروپ دی رکنیت لئی اہلیت ثابت کردے نیں۔
اوہناں نے آکھیا کہ پاکستان نے ایٹمی مواد دی برآمد روکن لئی اعتماد جوگ انتظامات کیتے نیں۔ اوہناں دا کہنا سی کہ پاکستان آیندا ایٹمی دھماکے نہ کرن اُتے راضی اے تے ہُن پاکستان بھارت نال ایٹمی دھماکے نہ کرن دا د و پاسی سمجھوتا کرن دی خاہش رکھدا اے۔
