لاہور(پاکستان پوائنٹ نیوز12۔ستمبر2017ء) لاہور الیکٹرک سپلائی کمپنی (لیسکو) نے قذافی سٹیڈیم لاہور وچ ہون والے آزادی کپ دے حوالے نال سارے انتظامات کر لئے نیں۔ قذافی سٹیڈیم وچ 15ستمبر تیکر کھیڈے جان والے آزادی کپ دوران بجلی دی لگاتار سپلائی نوں یقینی بنان لئی لیسکو دے چیف ایگزیکٹو سید واجد علی کاظمی نے لیسکو افسراں دی سربراہی وچ اُچیچیاں ٹیماں بنا دتیاں نیں۔
لیسکو ولوں جاری ہون والے اعلامیے مطابق ایس ای آپریشن ساؤتھ سرکل نوں لیسکو ولوں فوکل پرسن متھیا گیا۔ چیف انجینئر آپریشن ساؤتھ محمد ناصر میچاں دوران بجلی دی لگاتار فراہمی لئی سٹاف دی نگرانی تے کوآرڈینیشن کرن گے۔ ایکسیئن گلبرگ ڈویژن کسے وی بریک ڈاؤن یاں ہنگامی صورتحال نال نبڑن لئی اپنے ایس ڈی اوز تے متعلقہ سٹاف نال ساریاں اہم تھاواں تے موجود رہن گے۔
