اسلام آباد(پاکستان پوائنٹ نیوز24۔اگست2017ء) وزیر خارجا خواجا آصف نے امریکی صدر دے الزاماں نوں رد کردے ہوئے آکھیا اے کہ افغانستان وچ دہشت گرداں خلاف امریکا دی موثر کارروائی ویکھنا چاہندے نیں، افغانستان وچ لُکے دہشت گرد پاکستان اندر دہشت گردی دے ذمے وار نیں، پاکستان نوں قربانی دا بکرا بنان نال افغانستان وچ امن قائم کرن وچ مدد نہیں ملے گی، پرامن افغانستان لئی عالمی کوششاں دی حمایت کیتی۔
اوہناں نے سینیٹ اجلاس وچ گل بات کردے ہوئے آکھیاکہ قومی سلامتی کمیٹی نے پاکستان اُتے لائے گئے الزام رد کر دتے نیں۔ خواجا آصف نے آکھیا کہ پاکستان افغانستان نوں غیر مستحکم نہیں کر رہیا۔ پرامن افغانستان لئی عالمی کوششاں دی حمایت کیتی۔ ایس موقعے تے وزیر خارجا نے قومی سلامتی کمیٹی دا اعلامیہ وی پڑھ کے سنایا۔ جہدے تحت قومی سلامتی کمیٹی دے اجلاس وچ فیصلا کیتا گیا کہ وزیر خارجا خواجا آصف اتحادی ملکاں دے دورے کرن گے۔
اوہناں د ا کہنا سی کہ پاکستان نے دہشت گرد ی خلاف جنگ وچ قربانیاں دتیاں۔ اوہناں دا کہنا سی کہ اپنی زمین کسے خلاف ورتن دی اجازات نہیں دیواں گے۔ امریکا تے افغانستان نال تجربے شیئر کرنا چاہندے آں۔ لکھاں افغان مہاجر پاکستان آئے اسیں اوہناں دی پروہن چاری کیتی۔خواجا آصف دا کہنا سی کہ افغان جنگ پاکستان وچ نہیں لڑی جا سکدی۔ پاکستان نوں قربانی دا بکرا بنایاگیا۔ افغانستان وچ دہشت گرداں خلاف امریکا دی موثر کارروائی ویکھنا چاہندے نیں۔ اوہناں نے آکھیاکہ دہشت گردی دے خاتمے لئی امریکا نال پرامن تعاون کیتا۔ خواجا آصف دا کہنا سی کہ پاکستان خلاف افغانستان وچ دہشت گرداں دے محفوظ ٹھکانے بنے ۔ افغانستان وچ لُکے دہشت گرد پاکستان اندر دہشت گردی دے ذمے وار نیں۔
