پاناما جے آئی ٹی نوں لیڈ واجد ضیاء کر رہے سن پر کنٹرول کسے ہور دا سی: مسلم لیگ(ن)

پاناما جے آئی ٹی نوں لیڈ واجد ضیاء کر رہے سن پر کنٹرول کسے ہور دا سی: مسلم لیگ(ن)

لاہور(پاکستان پوائنٹ نیوز23۔اگست2017ء) مسلم لیگ (ن) دے رہنماواں نے آکھیا اے کہ پاناما جے آئی ٹی نوں لیڈ واجد ضیاء کر رہے سن پر کنٹرول کسے ہور دا سی، جے آئی ٹی دا رویہ تے طریقہ کار وی ٹھیک نہیں سی، نواز شریف دے اگلے پروگرام دا اعلان آؤندے کُجھ دناں وچ کیتا جائے گا۔ تفصیل مطابق لاہور وچ وفاقی وزیر ریلوے خواجا سعد رفیق تے وزیر قانون پنجاب رانا ثناء اللہ نے سانجھی پریس کانفرنس کردے ہوئے آکھیا کہ پاناما کیس دا جدوں مقدمہ دائر ہویا اودوں ای سانوں تحفظات سن۔

جہدا اسیں کئی وار ذکر کیتا پر ساڈی گل نہیں سُنی گئی۔ اوہناں نے آکھیا کہ قوم گواہ اے کہ اسیں پاناما جے آئی ٹی اُتے تحفظات مگروں عدالتی حکماں دی پیروی کیتی۔ عدالتی فیصلے نوں وی قبول کیتا۔ پاناما دی بجائے اقامہ اُتے فیصلا آیا، اجیہی تنخاہ اُتے نااہل کیتا گیا جو کدی لتی ای نہیں سی۔ اوہناں د اکہنا سی کہ منتخب وزیر اعظم نے اپنا وزارت عظمی دا دفتر خالی کر دتا پر سانوں عدالتی فیصلا قبول نہیں اے ایس لئی اسیں سپریم کورٹ وچ نظرثانی اپیل دی درخاست جمع کروائی اے۔

اوہناں نے آکھیا کہ ہن ایہ غلط تاثر دتا جا رہیا اے کہ شریف خاندان نیب وچ پیش نہیں ہو رہیا۔ ایس موقعے تے صوبائی وزیر قانون رانا ثناء اللہ نے آکھیا کہ نواز شریف کروڑاں پاکستانیاں دے لیڈر نیں۔ نواز شریف نے ملک دی ترقی لئی بہت کُجھ کیتا۔اوہناں نے آکھیاکہ واجد ضیاء اوہ پولیس افسر اے جہنے سارا کیریئر دفتراں وچ لنگھایا۔ واجد ضیاء نے کدی میاں بیوی دے جھیڑے تیکر دی تفتیش نہیں کیتی۔ اوہناں نوں پاناما جے آئی ٹی دا سربراہ بنا دتا گیا۔ اوہناں نے آکھیا کہ اجیہی انکوائری وچ پیش ہون نال کجھ نہیں ہوئے گا جس انکوائری دے نتیجے دا اعلان پہلے ای ہو گیا ہوئے۔