لاہور(پاکستان پوائنٹ نیوز22۔اگست2017ء) پیپلز پارٹی دے شریک چیئرمین و سابق صدر آصف زرداری نے امریکی صدر نوں للکاردے ہوئے آکھیا اے کہ ڈونلڈ ٹرمپ سانوں دھمکائے نہ اسیں پاکستانی تے مسلمان آں، ٹرمپ نوں پتا ہونا چاہیدا ایہ پاکستان اے افغانستان نہیں، امریکا حساب برابر کرنا چاہندا اے تے اسیں پائی پائی دا حساب کراں گے، نواز شریف جو چاہندے سن اوہی امریکی صدر نے آکھ دتا۔
میڈیا رپورٹس مطابق اوہناں نے امریکی صدر ڈونلڈ ٹرمپ دے پاکستان خلاف پالیسی بیان اُتے ردعمل دا وکھالا کردے ہوئے آکھیا کہ مینوں پاکستان دا درد اے ٹرمپ دی تقریر سُنن لئی رات ساری جاگیا۔ اسیں پاکستان نوں ذہانت تے محنت نال بچانا اے۔ اوہناں نے آکھیا کہ ڈونلڈ ٹرمپ سانوں دھمکائے نہ اسیں پاکستانی تے مسلمان آں۔ امریکا حساب برابر کرنا چاہندا اے تے اسیں اوہدے نال پائی پائی دا حساب کراں گے۔
آصف زرداری دا کہنا سی کہ پاکستان دیاں قربانیاں امریکا توں کیتے بُہتیاں نیں۔ اوہناں دا کہنا سی کہ نواز مودی دا یار اے ایس لئی امریکا لئی کوئی لابنگ نہیں کیتی۔ نواز شریف جو چاہندے سن اوہی امریکی صدر نے آج کیتا۔ سابق صدر دا کہنا سی کہ ٹرمپ نوں پتا ہونا چاہیدا کہ ایہ پاکستان اے افغانستان نہیں۔ ڈونلڈ ٹرمپ نے لڑائی لڑنی اے تے افغانستان وچ جا کے لڑے۔ اوہناں نے ہور آکھیا کہ این اے 120دا الیکشن پیپلز پارٹی تے لوکائی دا اپنا الیکشن اے۔
