طاہر القادری اپنے آپ نوں عالم آکھدے نیں پر میں اوہناں نوں انتہا پسند سمجھدی آں:عائشہ گلالئی

طاہر القادری اپنے آپ نوں عالم آکھدے نیں پر میں اوہناں نوں انتہا پسند سمجھدی آں:عائشہ گلالئی

اسلام آباد(پاکستان پوائنٹ نیوز21۔اگست2017ء) رکن قومی اسمبلی عائشہ گلا لئی نے آکھیا اے کہ طاہر القادری اپنے آپ نوں عالم آکھدے نیں پر میں اوہناں نوں انتہا پسند سمجھدی آں، جماعت اسلامی کمیٹی دی مخالفت کر کے عمران خان نیازی نوں اپنے پچھے نہ لُکن دیوے، عمران نیازی نے کیہ ساڈے مرداں نوں ہیجڑا سمجھیا ہویا اے؟ عمران خان نیازی بل کلنٹن نہیں نہ اوہ ایس ملک دے صدر بن سکدے نیں۔

عائشہ گلا لئی نے قومی اسمبلی دے اجلاس وچ خطاب کردے ہوئے آکھیا کہ عمران خان نیازی جلسیاں وچ موجود سوانیاں لئی آکھدے نیں کہ ساڈیاں سوانیاں۔ عمران نیازی نے کیہ ساڈے مرداں نوں ہیجڑا سمجھ ہویا اے؟ عمران نیازی دے ایہ آکھن مگروں وی مرد اپنیاں سوانیاں نوں جلسیاں وچ لے آؤندے نیں۔اوہناں دا کہنا سی کہ شاہ محمود قریشی تے جہانگیر ترین جلسیاں وچ سوانیاں نوں دھیاں تے بھیناں آکھدے نیں۔

عمران نیازی بل کلنٹن نہیں نہ اوہ ایس ملک دے صدر بن سکدے نیں۔ اوہناں نے آکھیا کہ پتا چلیا اے کہ جماعت اسلامی کمیٹی دی مخالفت کر رہی اے۔ جماعت اسلامی عمران خان نیازی نوں اپنے پچھے لُکن نہ دیوے۔ اک سیاسی جماعت دے قائد نے میرے تے میرے خاندان خلاف گلاں کیتیاں۔ عائشہ گلالئی نے آکھیاکہ طاہر القادری نے 14بندیاں دی موت نوں مذاق بنایا ہویا اے۔ طاہر القادری اپنے آپ نوں عالم آکھدے نیں پر میں اوہناں نوں انتہا پسند سمجھدی آں۔ اوہناں نے آکھیاکہ سمندر پار پاکستانیاں دی ملکی معیشت لئی وڈیاں خدمتاں نیں۔ سمندر پار پاکستانیاں دی انتخابی عمل وچ نمائندگی ہونی چاہیدی۔ سمندر پار پاکستانیاں نوں الیکٹرانک مشیناں راہیں ووٹنگ دی سہولت دتی جا سکدی اے۔