چودھری نثار (ن) لیگ اندر مضبوط اپوزیشن بنا سکے تے سیاست کرن گے نہیں تے چُپ رہن گے:وسیلے

چودھری نثار (ن) لیگ اندر مضبوط اپوزیشن بنا سکے تے سیاست کرن گے نہیں تے چُپ رہن گے:وسیلے

لاہور(پاکستان پوائنٹ نیوز18۔اگست2017ء) چودھری نثار (ن) لیگ دے لاڈلے رہنما دے طور اُتے جانے جاندے نیں جہناں دے اپنی ای پارٹی نال کئی اختلافات رہندے نیں تے اوہ رُس کے بِہ جاندے نیں جہدے مگروں ہمیشہ شہباز شریف چودھری نثار نوں منان جاندے نیں تے چودھری نثار نے ہمیشہ اوہناں دی گل منی اے جہدی وجہ دوواں رہنماواں وچکار ڈونگھی یاری اے۔ نواز شریف دی نااہلی مگروں چودھری نثار نے اپنی وزارت توں استعفا دیندے ہوئے سیاست توں وکھ ہون دا اشارا دتا سی پر ہن اوہ ڈاڈھے متحرک نظر آ رہے نیں۔

اوہ نواز شریف دیاں پالیسیاں توں ناخوش نظر آ رہے نیں جہدے وچ بیگم کلثوم نواز نوں این اے 120دے ٹکٹ دین دے معاملے سنے شہباز شریف نوں وزارت عظمی توں دور رکھن ورگیاں کئی ہور گلاں نیں۔ چودھری نثار نواز شریف دی اسلام آباد توں لاہور ریلی وچ وی رلتی نہیں ہوئے۔ آکھیا جا رہیا اے کہ چودھری نثار (ن) لیگ اندر اک مضبوط اپوزیشن بنان والے نیں جہدے مگروں اوہ نواز شریف دیاں پالیسیاں نال ٹکر لے سکن گے تے اوہناں نوں اپنیاں پالیسیاں بدلن تے مجبور کر سکن گے تے ایس مقصد وچ ایہ سمجھیا جا رہیا اے کہ شہباز شریف وی اوہناں نال نیں۔