لاہور(پاکستان پوائنٹ نیوز16۔اگست2017ء) سپریم کورٹ ولوں پیمرا نوں نواز شریف دیاں تقریراں تے پابندی لان دا حکم دتے جان دا امکان اے۔ تفصیل مطابق وزیر اعظم نواز شریف ولوں اپنی جی ٹی روڈ ریلی دوران چار دناں اندر کئی وار اپنیاں تقریراں وچ سپریم کورٹ دے ججاں نوں تنقید دا نشانا بنایا گیا۔ نواز شریف نے اپنی نااہلی نوں سازش قرار دیند ے ہوئے سپریم کورٹ دے اُچیچے بنچ دے پنجاں ججاں نوں تنقید دا نشانا بنایا۔
ایس حوالے نال کئی قانونی ماہراں ولوں آکھیا گیا اے کہ نواز شریف نے توہین عدالت کیتی اے۔ ایس لئی اوہناں خلاف ایکشن لتا جا سکدا اے جدکہ ایس حوالے نال مشہور پرچا کار و تجزیہ نگار نصرت جاوید دا کہنا اے کہ نواز شریف الطاف حسین ورگا کم کر رہے نیں۔ جے نواز شریف عدالت خلاف تقریراں توں باز نہ آئے تے اوہناں خلاف وی اوہو ہوئے گا جو الطاف حسین نال ہویا۔ اوہناں دا کہنا سی کہ الطاف حسین وانگ سپریم کورٹ ولوں پیمرا نوں نواز شریف دیاں تقریراں اُتے وی پابندی لان دا حکم دتا جا سکدا اے۔
