لاہور(پاکستان پوائنٹ نیوز14۔اگست2017ء) سابق وزیرا عظم میاں محمد نواز شریف نے آکھیا اے کہ ایجنڈے دا آئٹم نمبر ون ووٹ دا تقدس کروانا ہوئے گا، لوکائی دے ووٹ دا احترام سبھ کرن گے، لوکائی نوں سستا تے فوری انصاف دوان لئی قانون وچ ترمیم وی کراں گے، دادے دے زمانے دے کیس پوترا بھگت رہیا اے، لوکاں نوں گھر دیواں گے۔ اوہناں نے آزادی دیہاڑ دے موقعے تے مزار اقبال اُتے حاضری مگروں میڈیا نال گل بات کردے ہوئے آکھیا کہ اسیں پاکستان دی 70ویں سالگرھا منا رہے آں۔
پاکستان قائد اعظم دی قیادت وچ جمہوری ،قانونی تے ووٹ دی طاقت نال وجود وچ آیا پر بدقسمتی نال قائد اعظم دے فوت ہون مگروں اسیں قانون نوں ای پرانہ نہیں رکھیا بلکہ نظریہ ضرورت ایجاد کر لیا۔ جہدے نتیجے وچ قائد اعظم دا پاکستان ٹٹ گیا۔ ہن اوہناں ساہمنے اسیں شرمندہ آں پر اسیں کوئی سبق نہیں سکھیا۔ اوہناں دا کہنا سی کہ ہن ویلا آ گیااے کہ پاکستان نوں اوسے راہ تے پایا جائے جہدا قائد اعظم نے خاب ویکھیا سی۔ سانوں طے کرنا پئے گا کہ اسیں ہر صورت ووٹ دے تقدس نوں برقرار رکھوانا اے۔نواز شریف دا کہنا سی کہ لوکائی دے ووٹ دا احترام سبھ کرن گے۔لوکائی نوں سستا تے فوری انصاف دوان لئی قانون وچ ترمیم وی کراں گے۔ اوہناں دا کہنا سی کہ دادے دے زمانے دے کیس پوترا بھگت رہیا اے۔
