جہلم(پاکستان پوائنٹ نیوز10۔اگست2017ء) پاکستان مسلم لیگ (ن) دے قائد و سابق وزیر اعظم میاں محمد نواز شریف نے آکھیا اے کہ 5معزز ججاں نے اک جنبش قلم نال تہاڈے وزیر اعظم نوں گھر گھل دتا، ایہ توہین برداشت کرو گے؟ کرپشن ثابت نہ ہوئی تے آکھیا گیا کہ اپنے پُتر دی کمپنی توں تنخاہ کیوں نہ لئی؟ پہلے دھرنے والے فیر ملکہ برطانیا دی وفاداری دا حلف چکن والا مولوی کینیڈا توں آگیا، تُسیں ووٹ دے کے حکومت بدلدے او پر ڈکٹیٹر اک منٹ وچ پرچی پاڑ کے تہاڈے ہتھ پھڑا دیندا اے۔
اوہناں اسلام آباد توں جی ٹی روڈ راہیں لاہور واپسی دوران جہلم وچ کارکناں دے استقبالیہ کیمپ نال خطاب کردے ہوئے آکھیا کہ شاندار استقبال تے شکریہ آکھن لئی لفظ نہیں۔ کارکناں نال خطاب دوران نواز شریف دا کہنا سی کہ میں 2013نوں تہاڈے کول آیا سی۔اوس ویلے پاکستانی معیشت تباہی ول ودھ رہی سی۔ ملک اندھریاں وچ ڈُبیا ہویا سی۔ غریباں دا کوئی وارث نہیں سی۔
کارخانے بند ہو گئے سن۔ ملک بدحالی دی اک مثال پیش کر رہیا سی۔ سی این جی سٹیشناں تے لمیاں لمیاں لائناں لگیاں ہوئیاں سن۔ مزدور بے روزگار ہو رہے سن پر میں 2013وچ لوکائی نال وعدا کیتا سی کہ جان لڑا دیواں گا ملک نوں ترقی ول لیجان لئی۔ اوہناں دا کہنا سی کہ ہن انھیرے غرق ہو گئے، چانن واپس آ رہیا اے۔ دن رات اک کر کے 20,20مہینیاں وچ بجلی دے کارخانے لائے۔ لوڈشیڈنگ ختم ہو رہی اے۔ اگلے سال لوڈشیڈنگ ختم ہو جائے گی۔ پاکستان وچ امن قائم کرن دا وعدا کیتا سی۔ پاکستان وچ وچ امن واپس آ گیا اے۔کراچی دے حالات بہتر ہو گئے نیں۔ بلوچستان وچ وی امن اے۔
