وزیر اعظم نواز شریف دی صدارت ہیٹھ وفاقی کابینا دا اجلاس سارے منصوبے مِتھے ویلے مکمل کیتے جان،

وزیر اعظم نواز شریف دی صدارت ہیٹھ وفاقی کابینا دا اجلاس سارے منصوبے مِتھے ویلے مکمل کیتے جان،

اسلام آباد(پاکستان پوائنٹ نیوز18۔اگست 2016ء) وزیر اعظم میاں نواز شریف نے پاک چین اقتصادی راہداری دے تحت توانائی تے بنیادی ڈھانچے دے جاری منصوبیاں اُتے کم دی رفتار اُتے اطمینان دا وکھالا کردے ہوئے ہدایت کیتی اے کہ سارے منصوبے مِتھے ویلے مکمل کیتے جان۔تفصیل دے مطابق جمعرات نوں وزیر اعظم ہاؤس وچ کابینا دے اجلاس دی صدارت کردے ہوئے وزیراعظم نے آکھیا کہ جے ساڈے جاری کیتے گئے منصوبیاں دے فائدے حاصل کرنا چاہندے او تے سانوں توانائی تے بنیادی ڈھانچے دیاں لوڑاں دے حوالے نال آئندا دی منصوبا بندی پہلی ترجیح ہونی چاہیدی ۔

اوہناں دا کہنا سی کہ ایس گل نوں پچھلیاں حکومتاں نے نظر انداز کیتا ہویا سی۔ ایس دوران وزیر ہاؤسنگ و تعمیرات نے کابینا نوں نجی شعبے نال رلکے لینڈ بینکنگ لئی جوائنٹ پالیسی بارے بریفنگ دِتی۔ کابینا نے وزارت دی تجویز دی اصولی منظوری دے دِتی تے ایہنوں ہور بہتر بنان دی ہدایت کیتی جدکہ کابینا نے ”کوڈ آف کریمینل پروسیجرایکٹ 2016“ دے مجوزا مسعودا بل اُتے صوبیاں دی رائے حاصل کرن دا فیصلا کیتا جہدی وزیر اعظم ولوں بنائی گئی قانونی اصلاحات کمیٹی نے سفارش کیتی ۔

کابینا نے پاکستان تے ترکمانستان وچکار دفاعی پیداوار دے ایم او یو دی منظوری دِتی۔ پاکستان تے جاپان (جائیکا) وچکار توانائی دے شعبیاں دی اصلاحات دے پروگرام ٹو لئی قرضے دے سمجھوتے اُتے دستخط وی کیتے گئے ۔ ایس توں وکھ کابینا نے سرکاری شعبے دی آڈیٹنگ وچ تعاون، سرکاری شعبے دی آڈیٹنگ وچ تعاون بارے ویتنام دے سٹیٹ آڈٹ آفس تے سپریم آڈٹ انسٹی ٹیوشن آف پاکستان وچکار دو پاسی ایم او یو اُتے دستخط دی وی منظوری دِتی ۔

کابینا نے سٹیٹ بنک آف پاکستان تے روس دے سنٹرل بنک وچکار بنکاری تعاون بارے ایم او یو اُتے دستخط لئی گل بات شروع کرن دی منظوری دِتی۔ ایس توں وکھ پاکستان ترکمانستان وچکار سفارتی پاسپورٹ رکھن والیاں دے ویزے ختم کرن دے سمجھوتے اُتے دستخط دی وی منظوری دِتی گئی۔ جدکہ پاکستان قزاقستان وچکار مجرماں دے تبادلے بارے سمجھوتے اُتے وی دستخط کر دِتے گئے نیں۔