اسلام آباد (پاکستان پوائنٹ نیوز18۔اگست 2016ء) ٹیکس چوری نوں روکن لئی قومی اسمبلی دی قائما کمیٹی وچ بے نامی بل دی منظوری دے دِتی گئی اے۔ تفصیل دے مطابق قومی اسمبلی دی قائما کمیٹی برائے فنانس نے بے نامی ٹرانزیکشن بل 2016 دی منظوری دے دِتی اے۔ ایہ بل موجودا قانون وچ کیتیاں گئیاں کئی تبدیلیاں اُتے مشتمل اے جوکہ کسے وی پاکستانی شہری نوں بے نامی ٹرانزیکشن تے بے نامی اثاثے بنان توں روکے گا۔
بے نامی اثاثیاں دا مطلب پراپرٹی یاں اثاثیاں نوں کسے ہور ناں یاں کسے جعلی شناخت دے ذریعے ویچ وٹک کرنا اے۔ قائما کمیٹی نے ایس بل اُتے لمی بحث دے بعد ایس بل دا حتمی ڈرافٹ تیار کر لیا اے جہنوں قومی اسمبلی وچ ترمیم کر کے منظور کر لِتا جاوے گا۔ ایس بل وچ بیرون ملک آف شور کمپنیاں بارے شق وی شامل کیتی گئی اے۔ کیوں جے ملک وچ بیرون ملک قانونی یا غیر قانونی آف شور کمپنیاں بارے کوئی وی قانون موجود نہیں اے ایس لئی ایس نویں قانون دے تحت بیرون ملک کئی گئی ساری بے نامی ٹرانزیکشن نوں غیر قانونی قرار دِتا جاوے گا۔
