اسلام آباد(پاکستان پوائنٹ نیوز28۔جولائی 2017ء) پاکستان دے آئین مطابق وزیر اعظم نواز شریف دی نااہلی مگروں نویں وزیر اعظم دی حلف برداری تیکر قومی اسمبلی دے سپیکر ایاز صادق نے وزارت عظمی دیاں ذمے واریاں سنبھال لئیاں نیں پر مسلم لیگ (ن) نے سردار ایاز صادق نوں مستقل طور تے قائد ایوان بنان دا فیصلا کیتا اے جہدا باضابطا اعلان آن والے کُجھ دناں وچ کر دتا جائے گا۔
مسلم لیگ (ن) سپیکر قومی اسمبلی لئی کئی ناواں تے غور کر رہی اے جہناں وچ پارٹی دے کئی سینئر رہنما وی شامل نیں۔ وسیلیاں مطابق اسحاق ڈار‘ خواجا آصف‘ شاہد خاقان عباسی تے احسن اقبال دے ناں وزیر اعظم دے طور تے بحث ہیٹھ رہے نیں۔ نواز شریف دی نااہلی دی اک وجہ اوہناں دی دبئی دی آف شور کمپنی تے اقامہ وی قرار دتا جا رہیا اے تے نواز شریف کابینہ دے تِنوں سابق وزیر خزانا خواجا آصف‘ شاہد خاقان عباسی تے احسن اقبال دے اقامے وی ساہمنے آئے نیں جہدی وجہ توں مسلم لیگ (ن) اوہناں تے اعتبار کرن تے تیار نہیں ہوئے گی۔
وسیلیاں نے دسیا کہ میاں نواز شیف دے کئی ساتھی اوہناں نوں بیگم کلثوم نواز نوں وزیر اعظم بنان تے زور دے رہے نیں پر اوہ چھیتی منتخب نہیں ہو سکیاں پہلے اوہناں نوں رکن قومی اسمبلی منتخب کروایا جانا ضروری اے۔ دسیا جا رہیا اے کہ ممکنہ طور تے میاں نواز شریف دی نااہلی نال خالی ہون والی قومی اسمبلی دی سیٹ این اے 120لاہور توں بیگم کلثوم نواز نوں الیکشن لڑا کے وزیر اعظم بنایا جائے گا۔
